Паказваем, як Дэ Лёс пабачыў падзеі мінулага тыдня.
З самай раніцы 8 ліпеня з розных гарадоў Беларусі прыходзяць паведамленні пра пераслед незалежных медыяў. З’явілася паведамленне пра налёт на «Нашу Ніву». Ператрус прайшоў у офісе выдання, у кватэрах працаўнікоў – як журналістаў, гэтак і бухгалтаркі. Беларусь пакінулі некаторыя супрацоўнікі «Белсату», «Еўрарадыё», «Нашай нівы», TUT.BY.
Паводле апошніх звестак Беларускай асацыяцыі журналістаў цяпер у зняволенні ў Беларусі 31 працаўнік медыйнай сферы. Частка журналістаў праходзяць у якасці сведак па крымінальных справах. Таксама за кратамі або па-за межамі Беларусі знаходзяцца блогеры, якія распавядаюць пра грамадска-палітычную сітуацыю ў Беларусі.
У сацыяльнай сетцы Twitter нядаўна з’явілася старонка на імя Рамана Пратасевіча, які знаходзіцца пад хатнім арыштам. У якім статусе сам Раман Пратасевіч і хто кантралюе яго твітэр-акаўнт, дакладна не вядома, фармальна ён пад хатнім арыштам.
Літоўскія вайскоўцы пачалі ўсталёўваць дадатковую агароджу на мяжы Літвы і Беларусі. Бар’ер з дроту ставяць у раёне Друскінінкаю (Друскенікаў) на 30-кіламетровым участку.
30 чэрвеня сілавікі прыйшлі ў офіс касметычнай фірмы «Модум» у Менску. Працаўнікоў замкнулі ў памяшканні, а кіраўніцтва затрымалі.
З Беларусі з’ехала частка каманды TUT.BY, журналісты прэзентавалі новы праект Zerkalo.io, які робяць з-за мяжы.
ІК, малюнкі Дэ Лёс belsat.eu
