Як праходзіць суд над ім і адвакаткай Юліяй Юргілевіч.
Працэс распачаўся ў панядзелак 10 ліпеня і праходзіць у адкрытым рэжыме. На паседжанні пускаюць сваякоў і проста ахвочых паслухаць. У першы дзень пусцілі каля 7-8 чалавек. На другі дзень слухачоў пасадзілі на адну лаўку ў самай маленькай залі Гарадзенскага абласнога суду.
«Павел і Юлія выглядаюць у цэлым добра, здаровым. У аўторак былі больш стомленымі», – распавядае Ірына.
У панядзелак і аўторак паседжанні цягнуліся каля трох гадзінаў. У справе – 4 тамы. Першыя тры зачыталі за першы ж дзень. У другі – глядзелі аўдыё- і відэадоказы.
Паўла Мажэйку і адвакатку Юлію Юргілевіч абвінавачваюць па двух эпізодах – за 23 лютага і 30 сакавіка 2022 года. Нібыта ў гэтыя дні Юлія распавяла Паўлу ў тэлефоннай размове пра сваё звальненне з адвакатуры і пра прысуд Алесю Пушкіну.
Пракурор спрабуе даказаць, што менавіта Павел «размясціў» гэтую інфармацыю на старонцы тэлеканалу Белсат, прызнанага беларускімі ўладамі экстрэмісцкім фармаваннем – у нявызначаны час, нявызначаным спосабам, праз нявызначаных асобаў. Перадачу звестак Белсату следчыя расцанілі як «спрыянне экстрэмісцкай дзейнасці» (ч. 2 арт. 361 КК).
Павел і Юлія адразу цалкам адмовілі віну.
Юлію Юргілевіч возяць на суд з карцару і ў судзе яна заявіла, што яе трымаюць у «скоцкіх умовах», а таксама, што ёй не далі азнаёміцца з крымінальнай справай.
Сярод доказаў абвінавачання:
Ірына распавядае, што ў судзе «замест доказаў разглядалася рознае інфармацыйнае смецце». Так, напрыклад, суд гадзіну глядзеў дыск з улюбёным серыялам Юлінай маці, канфіскаваны пры ператрусе. Калі суддзя сказаў, што дыск будуць глядзець, у залі засмяялася прысутная жанчына, пасля чаго яе выдалілі з працэсу. Яшчэ адна жанчына засмяялася падчас праслухоўвання прамовы Юліі Юргілевіч на фразе «менты» – распаўсюджанае абывальніцкае слова». Яе таксама выдалілі з судовай залы.
Таксама цягам гадзіны слухалі запіс адвакацкай прамовы Юліі падчас працэсу Андрэя Аўсіевіча. Працэс той адбыўся ажно за паўгода да працэсу Алеся Пушкіна.
Яшчэ столькі ж часу прысвяцілі праслухоўванню запісаў побытавых размоваў бацькі Паўла і запіс праслушкі з нейкага незразумелага месца, магчыма, кавярні. На запісу можна было разабраць толькі нейкі абрыўкі словаў.
«Тэлефонны нумар, на які нібыта званіла Юлія ў дні здзяйснення «злачынства», належыць мне. Таму ва ўсіх іхных пратаколах праслушкі фігурую я, як субяседніца Юліі. Нават не пытайцеся, як яны будуць збіраць гэты тэтрыс».
Адвакаты неаднаразова заяўлялі адвод доказам, якія не маюць дачынення да справы.
«Той жа серыял – я ўвогуле не разумею, як ён мог застацца ў матэрыялах справы яшчэ на этапе папярэдняга следства, – кажа грамадзянская жонка палітзняволенага журналіста. – Ёсць уражанне, што яны проста запаўняюць справу хоць нейкімі матэрыяламі, бо ў іх няма ніякіх наўпроставых і нават ускосных доказаў».
У справе ўсяго два сведкі. Адзін з іх – бацька Паўла, ён адмовіўся даваць паказанні. Другога сведку не могуць знайсці, у суд ён не прыходзіць.
Чарговае паседжанне на ўвесь дзень прызначана на пятніцу, 14 ліпеня.
Марыя Міхалевіч belsat.eu