Прэзідэнт Украіны Уладзімір Зяленскі заявіў, што якія-небудзь перамовы з Расейскаю Федэрацыяй будуць магчымыя толькі пасля поўнага вызвалення ёй усіх захопленых украінскіх тэрыторыяў. Пра гэта ён сказаў 11 верасня ў інтэрвʼю CNN.
«Нельга здымаць ніякіх санкцыяў. Мы нічога не можам абмяркоўваць з Расеяй, пакуль яна не забярэцца адсюль. Пасля вайны – так, мы можам казаць пра адмену некаторых санкцыяў, пра рэпарацыі, плацяжы з іхнага боку, дыпламатыю. Мы можам прыцягнуць да такіх перамоваў лідараў любых краінаў, любыя міжнародныя інстытуты, але толькі пасля таго, як Расея вызваліць усе нашыя тэрыторыі», – сказаў Зяленскі.
Прэзідэнт Украіны лічыць, што Расея не разумее словаў міру, але добра адчувае сілу на полі бою.
Уладзімір Зяленскі адзначыў, што расейская стратэгія заключалася ў тым, каб уварвацца ў некаторыя часткі Украіны, выйграць час з дапамогаю дыскусіяў і пагадненняў, набрацца сілаў і пачаць новыя ўварванні.
«Я ведаю, што некаторыя дзяржавы будуць штурхаць нас у напрамку Менскага працэсу. Я хачу, каб усе зразумелі, што адна рэч – дыпламатычнае рашэнне, а іншая – Менск-2, 3, 5, 10. Гэта розныя рэчы, бо Менск – гэта пустая паперка, якая дазволіць Расеі адпачыць перад наступным уварваннем», – сказаў Зяленскі.
Таксама Уладзімір Зяленскі зазначыў, што пакуль не бачыць з боку РФ жадання ісці на канструктыўны дыялог.
«На сёння няма. Я не бачу ніякага жадання з іхнага боку быць канструктыўнымі. Што датычыць іхных ультыматумаў, то мне ўсё роўна, хто гэтыя ўльтыматумы вылучаў: Пуцін ці нехта іншы. Гэта мой прынцып: я не буду размаўляць з тымі, хто ставіць мне ўльтыматумы», – падкрэсліў украінскі прэзідэнт.
Антон Тачняк belsat.eu
