На трох прыватных яхтах група з 21 расейца прыплыла да берагоў Паўднёвай Карэі, ратуючыся ад мабілізацыі, паведамляе тэлеграм-канал «Агентство. Новости». Аднак дазвол на ўезд быў выдадзены толькі двум. Астатнім адмовілі, бо ўлады палічылі мэту іх візіту «невыразнай».
За апошнія некалькі дзён да порта Пхохан на паўднёвым усходзе краіны прышвартаваліся тры яхты, пераважна з расейскімі мужчынамі ва ўзросце ад 20 да 30 гадоў. На борце адной з яхт знаходзіліся дзевяць мужчын і адна жанчына, а на борце другой – яшчэ чатыры чалавекі.
Так, адна з яхт прыплыла 30 верасня, а расейцы, якія прыбылі на ёй, атрымалі ежу і неабходную дапамогу, але атрымалі і адмову ва ўездзе. 4 кастрычніка яхта пакінула берагі Паўднёвай Карэі.
Паведамляецца, што расейцам не патрабуецца віза для ўезду ў Паўднёвую Карэю, калі яны атрымліваюць папярэдні дазвол праз электронную сістэму аўтарызацыі, удакладніў прадстаўнік міністэрства юстыцыі.
Нагадаем, Уладзімір Пуцін абвясціў аб «частковай» мабілізацыі 21 верасня. Пасля гэтага расейцы пачалі масава з’язджаць з краіны. Так, білеты ў іншыя краіны былі распрададзены за некалькі гадзін, а на межах з Грузіяй, Казахстанам і Фінляндыяй утварыліся чэргі.
Алена Рувіна belsat.eu