СБУ паведаміла на сваім сайце, што задакументавала «новыя злачынствы пракрамлёўскай прапагандысткі Дзіяны Панчанкі». Яна – колішняя вядоўца тэлеканалаў Віктара Медведчука, а ў жніўні ўзяла інтэрв’ю ў Лукашэнкі. Панчанку цяпер западозрылі ў дзяржаўнай здрадзе.
Паводле версіі Службы бяспекі Украіны, Дзіяна Панчанка «прапагандуе ўзброеную агрэсію Расеі супраць Украіны і дапамагае вайскова-палітычнаму кіраўніцтву Расеі ў падрыўной дзейнасці».
«Сістэматычна апраўдвае ўзброеную агрэсію супраць Украіны, падтрымоўвае і спрыяе акупацыі рэгіёнаў нашай краіны, а таксама маніпуляцыйна асвятляе вайскова-палітычную сітуацыю ва Украіне і заклікае нашых суграмадзянаў не супрацьстаяць акупантам», – гаворыцца ў паведамленні СБУ.
Панчанка публікуе ролікі на YouTube, дзе мае амаль мільён падпісальнікаў, і прасоўвае свае матэрыялы «праз сетку пракрамлёўскіх Telegram-каналаў».
У сувязі з гэтым спецслужба завяла на прапагандыстку крымінальную справу паводле артыкулу «Дзяржаўная здрада, здзейсненая ва ўмовах ваеннага становішча».
«Паколькі Панчанка хаваецца ад правасуддзя, прымаюцца вычарпальныя захады дзеля прыцягнення яе да адказнасці», – падсумавалі ў СБУ.
Раней на прапагандыстку завялі справу за выраб і распаўсюд матэрыялаў, што апраўдваюць узброеную агрэсію Расеі супраць Украіны.
Дзіяна Панчанка – колішняя вядоўца тэлеканалаў, што былі падкантрольныя Віктару Медведчуку, куму Уладзіміра Пуціна і былому лідару забароненай ва Украіне партыі «Опозиційна платформа – За життя».
Сёлета ў жніўні Панчанка запісала інтэрв’ю з Аляксандрам Лукашэнкам. Падчас той размовы ён кляўся, што не ведаў пра планы Пуціна атакаваць Украіну, і казаў, што Пуцін прасіў «прыкрыць яго, калі што».
Сяргей Крот belsat.eu
