Палітзняволенага блогера і актывіста анархісцкага руху Мікалая Дзядка 12 лютага этапавалі з магілёўскай турмы №4 у калонію, паведамляецца на ягонай старонцы ў Instagram.
У якую менавіта калонію перавялі актывіста, пакуль невядома.
Прысуд 33-гадоваму Мікалаю Дзядку вынеслі ў Менскім гарадскім судзе 10 лістапада. Суддзя Наста Папко прызнала яго вінаватым па трох артыкулах Крымінальнага кодэксу: арт. 342,ст. 361,ст. 295-3 і прызначыла пакаранне ў выглядзе пяці гадоў пазбаўлення свабоды ва ўмовах агульнага рэжыму. Такое ж пакаранне запытваў пракурор Антон Цюменцаў.
Актывіст не прызнаў віну ні па ніводным артыкуле.
У канцы мінулага месяца, 25 студзеня, Вярхоўны суд разгледзеў апеляцыйную скаргу на прыгавор палітвязня.
Скаргу разглядала судовая калегія Вярхоўнага суда, у якую ўваходзілі суддзі Уладзімір Давыдаў, Андрэй Кавальчук і Мікалай Грынцэвіч. У паседжанні прыняў удзел пракурор Генеральнай пракуратуры Андрэеў. Калегія пакінула скаргу без задавальнення, а прысуд – без змен.
АД, belsat.eu