Матэрыялы справы неўзабаве перададуць у пракуратуру, а потым – у суд, паведамляе «Гомельская вясна».
Гомельскага краязнаўцу і журналіста Яўгена Меркіса затрымалі 13 верасня. У кватэрах журналіста, ягоных сяброў і бацькі правялі ператрусы ды сканфіскавалі тэхніку. Яўгену выставілі абвінавачванне паводле арт. 361-4 КК РБ («Спрыянне экстрэмісцкай дзейнасці»). Гомельцу пагражае ад 2 да 6 гадоў пазбаўлення волі.
Надоечы стала вядома, што Меркіса на чатыры дні кідалі ў карцар гомельскага СІЗА. Палітвязня пакаралі жорсткімі ўмовамі ўтрымання за тое, што «не пагаліўся».
Яўген Меркіс – журналіст, які асвятляў акцыі пратэсту пасля прэзідэнцкіх выбараў 2020 года. Яго неаднаразова затрымлівала міліцыя, праз суды штрафавала і адпраўляла на содні. Пасля прызнання ўладамі Беларусі шэрагу незалежных медыяў экстрэмісцкімі фармаваннямі Яўген займаўся краязнаўчаю дзейнасцю.
Падтрымаць палітзняволенага журналіста Яўгена Меркіса можна, напісаўшы на адрас: СІЗА № 3, Кніжная, 1А, 246003, г. Гомель.
На дзень 13 сакавіка 2023 года за кратамі ў Беларусі застаюцца 33 журналісты і працаўніка медыяў, паводле інфармацыі Беларускай асацыяцыі журналістаў.
Марыя Міхалевіч belsat.eu