Міністр абароны Польшчы Мар’юш Блашчак заявіў TVP Info пра намер узмацніць абарону Берасцейскай брамы на мяжы з Беларуссю.
Паводле міністра, чакаецца, што на наступным тыдні Кангрэс ЗША мусіць прыняць канчатковае рашэнне адносна перадачы Польшчы верталётаў «Apache». Блашчак лічыць, што амерыканскія верталёты «Apache» і танкі «Abrams» складуць «непераадольны барʼер», які закрые Берасцейскую браму. Такім чынам, бяспека Польшчы будзе ўмацаваная.
Акрамя таго, бяспеку Польшчы на мяжы з Беларуссю будуць забяспечваць паўднёвакарэйскія танкі K2 Black Panther, баявыя самалёты FA-50 і ракетныя сістэмы HIMARS.
Берасцейская брама – гэта паласа шырынёй 80 км паміж рэкамі Нараў і Буг на беларуска-польскім памежжы. Абарона гэтага ўчастку выклікае падвышаную ўвагу на фоне размяшчэнне ў Беларусі наймітаў ПВК Вагнэра і агрэсіўнай рыторыкі Аляксандра Лукашэнкі і Уладзіміра Пуціна.
У ліпені прэзідэнт Польшчы Анджэй Дуда заявіў, што ў выпадку атакі на Берасцейскую браму на тэрыторыю Польшчы будуць перакінутыя 100 тысяч жаўнераў NATO.
Глеб Нержын belsat.eu