Суд Еўразвязу не задаволіў пазоваў беларускай IT-кампаніі «Synesis» і яе ўладальніка Аляксандра Шатрова да Рады ЕЗ з патрабаваннем зняць з іх санкцыі. Пра гэта паведамляе «Deutsche Welle». Кампанія перадавала ўладам Беларусі сістэмы відэаназірання з распазнаннем асобаў.
Кампанія «Synesis» трапіла пад санкцыі ЕЗ у 2020 годзе за перадачу ўладам Беларусі доступу да платформы распазнавання асобаў «Kipod». Шатроў трапіў у чацвёрты санкцыйны спіс Еўразвязу ў чэрвені 2021 года. На фірму ўсклалі адказнасць «за рэпрэсіі супраць грамадзянскай супольнасці і дэмакратычнай апазіцыі з боку дзяржаўнага апарату ў Беларусі» і за дапамогу КДБ і Міністэрству ўнутраных справаў.
«Synesis» дала ўладам Беларусі платформу відэаназірання «Kipod», якая дазваляе ажыццяўляць пошук і аналіз відэазапісаў, а таксама выкарыстоўваць праграмнае забеспячэнне для распазнання асобаў, што робіць кампанію адказнай за рэпрэсіі грамадзянскай супольнасці і дэмакратычнай апазіцыі з боку дзяржаўнага апарата Беларусі», – гаворыцца ў афіцыйным часопісе Еўразвязу.
У 2022 годзе Аляксандр Шатроў і «Synesis» падалі пазовы, у якіх называлі ўвядзенне санкцыяў супраць іх незаконным.
Сёлета ў сакавіку Высокі суд юстыцыі Лондану таксама адхіліў пазоў кампаніі «Synesis» аб скасаванні санкцыяў Вялікай Брытаніі. Гэта была першая апеляцыя, якую вывучалі ў Брытаніі паводле палажэння аб судовым пераглядзе мясцовага закону аб санкцыях і барацьбе з адмываннем грошай 2018 года.
«Synesis» – адзін з рэзідэнтаў Парку высокіх тэхналогіяў, створанага на загад Аляксандра Лукашэнкі, праз гэта кампанія карыстаецца шматлікімі льготамі. Такім чынам, яна мае выгаду са сваёй сувязі з рэжымам Лукашэнкі і ягонага падтрымання, сцвярджаюць у Бруселі.
Алена Рувіна belsat.eu
