Супрацоўнікі Упраўлення ўнутранай бяспекі затрымалі паляка, які падазраецца ў шпіянажы на карысць беларускай разведкі, паведаміў прэс-сакратар Нацыянальнай пракуратуры Польшчы Лукаш Лапчынскі.
Мужчына ўжо выслухаў абвінавачванні. Суд пастанавіў папярэдне затрымаць яго на тры месяцы.
Падазраванага затрымлівалі супрацоўнікі Агенцтва ўнутранай бяспекі. Цяпер праводзіцца расследаванне па факце ўдзелу мужчыны ў дзейнасці беларускай разведкі, якая супярэчыць інтарэсам Польшчы.
«Мужчына, затрыманы Агенцтвам унутранай бяспекі, з’яўляецца грамадзянінам Польшчы. Яго абвінавацілі ў шпіянажы на карысць беларускай спецслужбы КДБ», – паведаміў Станіслаў Жарын, прэс-сакратар міністра па каардынацыі спецслужб.
Вядома, што на пачатку 1980-х мужчына быў супрацоўнікам ZOMO (спецназ грамадзянскай міліцыі ў камуністычнай Польшчы), пасля працаваў у паліцыі, а ў 2001 годзе сышоў на пенсію як афіцэр памежнай службы.
АД, belsat.eu
