Праваабаронца Вольга Раманава паведаміла пра гібель ва Украіне беларуса, якога ПВК Вагнэра завербавала ў калоніі. Паводле ейных звестак, сястра загінулага не можа атрымаць ягонае цела для пахавання.
Кіраўніца праваабарончага цэнтру «Русь сидящая» Вольга Раманава напісала ў сваім Telegram-канале пра масавыя звароты з краінаў СНД. Людзі скардзяцца, што іхных сваякоў, якія адбываюць пакаранне ў расейскіх калоніях, забіраюць на вайну ва Украіне.
У прыватнасці, праваабаронцы атрымалі зварот грамадзянкі Беларусі, чый брат загінуў ва Украіне. ПВК Вагнэра завербавала мужчыну ў калоніі.
«Сястра загінулага зняволенага, грамадзяніна Беларусі, не можа дамагчыся ад ПВК Вагнэра цела брата, каб пахаваць яго на радзіме. Ні пра якія грошы ці кампенсацыю гаворка не ідзе», – паведаміла Раманава.
Раней у Галоўным упраўленні выведкі Міністэрства абароны Украіны заявілі, што расейскія прыватныя вайсковыя кампаніі вярбуюць наймітаў на тэрыторыі Беларусі, у некаторых гарадах адкрылі вярбовачныя пункты, у тым ліку ў Менску.
Сяргей Крот belsat.eu
