Генштаб ЗСУ ў сваёй справаздачы паведаміў пра рост сацыяльнага напружання ў Берасцейскай вобласці Беларусі. У тамтэйшых шпіталях жыхарам адмаўляюць у прыёме, бо месцы занятыя расейскімі вайскоўцамі.
Генштаб Узброеных сілаў Украіны ў чарговай справаздачы, што рыхтуюцца штодзённа, паведаміў пра рост сацыяльнага напружання ў Берасцейскай вобласці Беларусі, асабліва ў тых раёнах, куды прыбываюць фармаванні расейскай арміі. Мясцовыя лякарні, паводле звестак з Кіева, вымушаныя адмаўляць беларусам у абслугоўванні, бо перагружаныя працай з расейскімі вайскоўцамі.
«Расейскія вайскоўцы масава хварэюць праз нездавальняючыя ўмовы ў намётавых гарадках», – гаворыцца ў паведамленні Генштабу ЗСУ.
У справаздачы таксама адзначаецца, што на Валынскім і Палескім кірунках ва Украіне «абстаноўка без істотных зменаў», на тэрыторыі Беларусі «трывае фармаванне расейска-беларускай групоўкі войскаў».
Сяргей Крот belsat.eu
