490 дзён працягваецца палітычны крызіс у Беларусі. Як мінуў чарговы дзень супрацьстаяння ўладаў і грамадзянаў краіны ў аглядзе «Белсату».
Ігар Карпенка стаў кіраўніком Цэнтральнай выбарчай камісіі. Былы Міністр адукацыі змяніў на гэтай пасадзе Лідзію Ярмошыну, якая кіравала ЦВК з 1996 года.
Генеральная пракуратура Беларусі распачала крымінальную справу супраць Паўла Латушкі. Палітыка абвінавачваюць паводле ч.3 арт.426 КК («Учыненне злачынства супраць інтарэсаў службы»).
Мікалая Брэдзелева, кіраўніка ўпраўлення сувязяў з грамадскасцю кампаніі «А1 Беларусь» пакаралі 15 соднямі адміністратыўнага арышту, піша выданне «Наша ніва».
У сваю чаргу ў «A1 Telekom Austria Group» рашуча асудзілі ўварванне ў асабістае жыццё прэс-сакратара «A1 Беларусь» Мікалая Брэдзелева, затрыманага 10 снежня ў Беларусі.
Аляксандр Лукашэнка даў інтэрв’ю турэцкай тэлерадыёкампаніі TRT і расказаў, у якім выпадку Беларусь можа перакрыць транзіт газу ў Еўропу, паведамляе БелТА.
«Калі санкцыі, якія яны ўводзяць або ўвядуць у будучым, паставяць нас у надзвычайнае становішча і ў нас не будзе ніякага выхаду адказаць іншымі захадамі на іх санкцыі, мы выкарыстаем і гэту жорсткую захаду», – сказаў Аляксандр Лукашэнка.
Вярхоўны прадстаўнік Еўразвязу Жузэп Бурэль на прэсавай канферэнцыі падвёў вынікі так званага міграцыйнага крызісу, які распачаў Лукашэнка.
«Праз актыўныя дыпламатычныя намаганні мы змаглі спыніць у Беларусь і да межаў ЕЗ плынь мігрантаў, якіх падманулі пустымі абяцаннямі аб шляху ў Еўропу. Мы спынілі плынь. Лукашэнка не дабіўся сваёй мэты. І цяпер праблемы ў яго», – сказаў вярхоўны прадстаўнік Еўразвязу Жузэп Бурэль.
Міністэрства транспарту і камунікацыяў Літвы падрыхтавала законапраект, паводле якога прапаноўвае забараніць імпарт прадукцыі з Беларусі. Пад санкцыі трапіць і транзіт «Беларуськалія», піша ТАСС са спасылкай на літоўскае агенцтва BNS.
КІ belsat.eu