У Менску сілавікі затрымалі некалькі бармэнаў, папярэдне – за ўдзел у нейкім чаце, дзе абмяркоўвалі прафесійныя пытанні. Аб гэтым паведамляе «Вясна».
14 студзеня праваабаронцам стала вядома аб затрыманні некалькіх менскіх бармэнаў. Папярэдне, затрымана як мінімум трое праўстаўнікоў гэтай галіны. Сярод затрыманых называюць бар-менеджара Яўгена Кузняцова.
«Паводле непацверджанай інфармацыі, затрыманні бармэнаў звязаныя з нейкім іх чатам – сілавікі прыходзяць да ўсіх яго ўдзельнікаў», – гаворыцца ў паведамленні.
Імаверна, што бар-менеджар Яўген Кузняцоў затрыманы некалькі дзён таму. Інфармацыя пра яго меркаванае затрыманне зʼявілася спачатку ў сацсетках.
Яўген – дзеючы бармэн, спецыяліст па адкрыцці і кіраванні барнымі праектамі, кіруючы партнёр культурнай пляцоўкі «Lo-Fi Social Club», якая прыняла рашэнне аб закрыцці напачатку сакавіка 2022 году.
Антон Тачняк belsat.eu
