На тэрыторыі Беларусі распрацоўваецца спецаперацыя, падчас якой беларускія вайскоўцы павінны апрануць форму РФ для ўварвання ва Украіну. Пра гэта заявіў сакратар Рады нацыянальнай бяспекі і абароны Украіны Аляксей Данілаў падчас тэлемарафону «UA Разом».
«Сёння на тэрыторыі Беларусі распрацоўваецца спецаперацыя Расейскай Федэрацыяй. Яны сёння маюць вялікае жаданне адзець у форму РФ беларускіх вайскоўцаў. Частка беларусаў адмаўляецца ваяваць супраць нашай краіны. Але зараз ФСБ РФ і спецслужбы на сённяшні дзень угаворваюць беларусаў пераапрануцца ў расейскую форму і па расейскіх, умоўна кажучы, лякалах заходзіць на нашу тэрыторыю», – распавёў ён.
Данілаў зазначыў, што беларусы будуць атрымліваць адпор, «які ўжо атрымліваюць расейцы і чачэнцы».
Нагадаем, што, паводле звестак брытанскага даследчага цэнтру «Chatham House», беларусы не падтрымліваюць магчымага далучэння беларускага войска да вайны супраць Украіны на баку Расеі.
За ўдзел беларускіх вайскоўцаў выказаліся толькі 3 % апытаных гараджанаў.
Тым часам ва Украіне працягваецца фармаванне беларускага батальёну імя Кастуся Каліноўскага, які дапамагае ўкраінцам бараніцца ад расейскай агрэсіі. Паводле заяваў прадстаўнікоў батальёну, у ім ужо сотні беларусаў, і штодня прыбываюць новыя, яшчэ некалькі сотняў ужо кіруюцца ва Украіну з Варшавы.
Агулам, як заяўляецца, асабіста запісаліся ці падалі заяўку на ўступленне ў батальён онлайн ужо больш як тысяча асобаў.
ПС belsat.eu
