Міністэрства абароны Беларусі правядзе ў сакавіку прызыў вайскоўцаў запасу на зборы. Аб гэтым паведамляе прэсавая служба ведамства.
14 сакавіка Міністэрства абароны РБ паведаміла аб правядзенні прызыву вайскоўцаў запасу на зборы.
«Ва Узброеных Сілах працягваюцца планавыя мерапрыемствы па павышэнні ўзроўню баявой гатовасці злучэнняў і воінскіх часцей, у рамках якіх на працягу сакавіка будзе ажыццяўляцца планавы прызыў ваеннаабавязаных на ваенныя зборы», – гаворыцца ў паведамленні.
Паведамляецца, што прызваныя на зборы будуць павышаць свае прафесійныя веды, пазнаёмяцца з новымі ўзорамі ўзбраення, ваеннай і спецыяльнай тэхнікі, прымуць удзел у спланаваных трэнаваннях і вучэннях.
Нагадаем, што 10 студзеня Мінабароны паведаміла аб завяршэнні мерапрыемстваў праверкі ўліковых дадзеных ваеннаабавязаных, якія па даручэнні Аляксандра Лукашэнкі праводзіліся з сярэдзіны кастрычніка па снежань 2022 года. Паводле афіцыйных звестак, праверку прайшлі больш за 95% ваеннаабавязаных запасу.
Антон Тачняк belsat.eu