Няшчасны выпадак адбыўся ўвечары 13 чэрвеня на возеры каля вёскі Барысавічы Клімавіцкага раёну Магілёўскай вобласці. Мясцовыя жыхары паведамілі ратавальнікам пра 14-гадовага падлетка, які патануў разам з канём.
Пастух, які заганяў статак, убачыў, што на паверхні вады плавае цела каня. Раней хлопчык пайшоў выкупаць каня. Прыбылыя ратавальнікі дасталі жывёліну з вады, а вадалазы ТВВОД дасталі патанулага хлопчыка.
Абставіны гібелі высвятляюцца. Як паведамляюць следчыя, падлетак пачаў рухацца ўздоўж берага верхам на кані, а праз некалькі дзясяткаў метраў жывёліна трапіла на глыбіню і схавалася разам з падлеткам.
Рыбак, які быў побач, дапамагчы не здолеў праз сталы ўзрост.
Алена Рувіна belsat.eu
