Старшыня рады дырэктараў расейскага «Газпрому» Аляксей Мілер заявіў 13 кастрычніка, што рамантаваць «Паўночную плынь» у месцы ўцечкі няма сэнсу, газаправод моцна пашкоджаны. Расея плануе пераарыентаваць экспарт газу ў Еўропу на Турцыю. Аб гэтым паведамляе расейскі «Первый канал».
Паводле Аляксея Мілера, у трубах газаправоду «Паўночная плынь» у бок Расеі адбыўся «поўны разрыў», і яны запоўніліся вадой «на вельмі вялікую адлегласць».
«Трэба фактычна адрэзаць вельмі вялікі кавалак трубы на вялікай адлегласці і фактычна на гэтым участку будаваць новы ўчастак», – растлумачыў Мілер.
Кіраўнік «Газпрому» адзначыў, што расейскіх спецыялістаў да месца аварыі не дапусцілі, а высновы аб пашкоджаннях зробленыя на аснове паказнікаў хуткасці страты ціску ў трубе.
Мілер паведаміў, што Расея плануе перанакіраваць экспартавыя абʼёмы ў Еўропу з магістраляў «Паўночнай плыні» на Турцыю. Масква ўжо атрымала згоду Анкары на пашырэнне газавай супрацы.
«Плюс на мяжы Турцыі і ЕЗ мы будзем абмяркоўваць пытанне стварэння хабу – гандлёвай пляцоўкі, якая магла б стаць коштавым індыкатарам для продажу газу на рынках краінаў-спажыўцоў», – заявіў Мілер.
Як паведамлялася раней, газаправод «Паўночная плынь» 27 верасня даў цечу пасля моцных падводных удараў, якія адразу называлі выбухамі. Выявілі чатыры выцекі як на першай, так і на другой «Плыні».
«Паўночная плынь – 2» была пабудаваная, але не ўведзеная ў эксплуатацыю, прычынай стала прызнанне Масквой незалежнасці «ДНР» і «ЛНР». Праз «Паўночную плынь – 1» паліва дагэтуль пампавалася, але газаправод працаваў не на ўсю моц. Расея спасылалася на праблемы з турбінай.
Антон Тачняк belsat.eu
