У Лунінцы на вайсковым аэрадроме ў экстраным парадку заканчваюць мадэрнізаваць казармы, што прызначаюцца расейскім вайскоўцам, паведамляе выданне «Медиа-Полесье».
«Матэрыялы і абсталяванне для казармы выкарыстоўваюцца самыя сучасныя. Таксама цалкам перабудаваная дарога пры ўездзе ў вайсковую базу. Высякаліся для пашырэння дарогі векавыя лясы», – гаворыцца ў матэрыяле.
Генеральны падрадчык будаўніцтва – Лунінецкі ПМК-19. Але праз тэрміновае ўвядзенне абʼекту ў капітальным будаўніцтве бяруць удзел розныя арганізацыі.
Паводле інфармацыі будаўніка, праца вядзецца пад наглядам узброеных асобаў. У працаўнікоў пры ўваходзе на аб’ект адбіраюцца тэлефоны, таму зняць саму будоўлю няма магчымасцяў.
Лётна-тактычныя ваенныя вучэнні з удзелам расейскіх і беларускіх вайскоўцаў запланаваныя ў Беларусі з 16 студзеня да 1 лютага 2023 года. У іх возьмуць удзел воінскія фармаванні паветрана-касмічных сілаў РФ.
Раней паведамлялі, што будуць задзеяныя ўсе аэрадромы і палігоны ВПС і войскаў СПА УС Беларусі. Вайсковым аэрадром у Лунінцы таксама задзеялі падчас супольных з Расеяй вучэнняў.
Алена Рувіна belsat.eu