«Беларускі Гаюн» сёння паведаміў пра прыезд у вёску Цэль баевікоў ПВК Вагнэра. У Асіповіцкім райвыканкаме ў адказ на пытанне пра тое, ці сапраўды найміты ўжо прыбылі, параілі «слухаць афіцыйныя крыніцы».
Паводле неафіцыйных звестак, буйная калона легкавых і цяжкавых аўтамабіляў з нумарамі самаабвешчаных ДНР і ЛНР рушыла праз Крычаў, Рагачоў і Бабруйск, а затым – на Асіповічы. Імаверны пункт прызначэння – вёска Цэль, дзе пабудавалі намётавы гарадок. У калоне налічылі мінімум 60 аўтамабіляў, піша «Беларускі Гаюн».
У Асіповіцкім райвыканкаме з карэспандэнтам «Белсату», які пазваніў пад выглядам устурбаванага мясцовага жыхара, размаўляць адмовіліся.
«Слухайце афіцыйныя крыніцы», – заявілі ў выканкаме і паклалі слухаўку.
«Белсат» таксама дазваніўся да жыхаркі вёскі Пратасевічы, дзе знаходзіцца сельсавет, да якога адносіцца суседняя Цэль. Жанчына запэўніла, што ніякіх вагнэраўцаў не бачыла.
«Нікога няма. Нікога не слухайце!»
Напярэдадні ў Мінабароны заявілі, што падпісалі з ПВК Вагнэра «дарожную мапу» для абмену досведам паміж беларускімі вайскоўцамі і наймітамі. Паведамлялася, што баевікі ўжо выступілі інструктарамі на занятках тэрытарыяльнай абароны.
Сяргей Крот belsat.eu