«Белсат» працягвае адсочваць факты рэпрэсіяў беларусаў рэжымам Лукашэнкі. Распавядаем пра выпадкі, пра якія стала вядома 15 снежня.
Палітзняволеную журналістку TVP Ірыну Слаўнікаву этапавалі з СІЗА ў гомельскую жаночую калонію. Ірыну абвінавацілі і прызналі вінаватай паводле ч.1 арт. 361-1 КК («Стварэнне экстрэмісцкага фармавання або ўдзеле ў ім») а таксама ч. 1 арт. 342 КК («Арганізацыі і падрыхтоўка дзеянняў, якія груба парушаюць грамадскі парадак»). Журналістку асудзілі да 5 гадоў калоніі.
Падтрымаць Ірыну можна лістом: ПК № 4, 246035, Гомель, Антошкіна, 3, Ірына Аляксандраўна Слаўнікава
Надзею Астапчук, вядомую спартоўку, прызёрку Алімпійскіх гульняў, чэмпіёнку свету і Еўропы схапілі сілавікі. Надзея Астапчук пасля выбараў 2020 году падтрымала беларусаў, выказалася крытычна пра фальсіфікацыі і гвалт з боку ўладаў.
Вядома, што Надзея Астапчук цяпер знаходзіцца на Акрэсціна. Прычыны затрымання невядомыя. Перадачу для яе не прынялі.
Сілавікі зладзілі затрыманні ў Жлобіне. Праваабаронцам вядома, што схапілі Марыну Ляхновіч, Таццяну Дземчанка, Вадзіма Кір’янава, Настассю Татарынава і Кірыла Камарова. Затрыманых абвінавачваюць ва ўдзеле ў пратэстах у Жлобіне ў жніўні 2020 года.
У Кастрычніцкім судзе сталіцы асудзілі палітвязня Мікіту Саідава. Паводле праваабаронцаў, 19-гадовага менчука прызналі вінаватым паводле ч.1 арт. 342 КК («Арганізацыя і падрыхтоўка дзеянняў, якія груба парушылі грамадскі парадак») а таксама паводле ч. 1 арт. 328 («Незаконны абарот наркатычных сродкаў і псіхатропных рэчываў»). Суддзя Іна Сівец прысудзіла хлопцу абмежаванне волі без накіравання ва ўстанову адкрытага тыпу тэрмінам на на 2,5 гады.
Сілавікі палічылі, што Уладзімір Гундар, які мае інваліднасць і асуджаны ў «справы Аўтуховіча», абразіў пракурора. Супраць палітвязня распачалі крымінальную справу паводле арт. 369. Якім чынам палітычны зняволены «абразіў» пракурораў, не вядома. Праваабаронцы паведамляюць, што абвінавачання Уладзіміру Гундару пакуль не выставілі, але гэта можа адбыцца на наступным тыдні.
Таксама стала вядома, што сілавікі завялі крымінальную справу і супраць Паўла Разановіча.
Уладзіміра Гундара і Паўла Разановіча асудзілі да 18 і 19 гадоў калоніі адпаведна. Прысуд палітвязням агучылі 17 кастрычніка сёлета.
Алена Аляксандрава belsat.eu