Планы Расеі перавезці ў Беларусь ядравую зброю абмеркавалі сёння на пасяджэнні Групы ядравага планавання NATO. Пра гэта кіраўнік альянсу паведаміў на прэс-канферэнцыі ў Бруселі. «Мы будзем уважліва сачыць. Мы будзем захоўваць пільнасць», – заявіў Енс Стольтэнбэрг.
Генеральны сакратар NATO Енс Стольтэнбэрг паведаміў, што сёння Група ядравага планавання абмеркавала сітуацыю з перасоўваннем у Беларусь расейскай ядравай зброі. Кіраўнік альянсу пры гэтым адмовіўся раскрываць падрабязнасці гэтай сустрэчы:
«Вядома ж, мы сур’ёзна ставімся да таго, што Расея абвясціла аб размяшчэнні ядравай зброі ў Беларусі. Мы бачылі, што ідзе пэўнае рыхтаванне. Мы будзем уважліва сачыць за тым, што яны робяць. Мы будзем захоўваць пільнасць».
Стольтэнбэрг адзначыў, што пакуль дзеянні Масквы і Менску не вымусілі NATO нешта змяніць у сваёй пазіцыі.
«Дагэтуль мы не бачылі ніякіх зменаў у разгортванні расейскага ядравага патэнцыялу, што патрабуе якіх-кольвек зменаў у нашай пазіцыі, але мы будзем пастаянна ацэньваць, што рабіць», – падсумаваў генеральны сакратар NATO.
Раней сталая прадстаўніца ЗША пры NATO Джульен Сміт адказала на пытанне карэспандэнта «Белсату» наконт намераў размяшчэння расейскай ядравай зброі ў Беларусі.
«Мы, Злучаныя Штаты, вельмі адкрыта папярэдзілі расейцаў пра рызыкі выкарыстання тактычнай ядравай зброі, любой ядравай зброі ў гэтай вайне. І мы папярэдзілі іх пра наступствы, сур’ёзныя наступствы, з якімі яны сутыкнуцца, калі захочуць гэта зрабіць. Мы будзем вельмі ўважліва сачыць за гэтым, асабліва ў сувязі з любымі новымі падзеямі ў Беларусі», – сказала Джульен Сміт.
Ядравую зброю Аляксандр Лукашэнка і расейскі прэзідэнт Уладзімір Пуцін плануюць размясціць у Беларусі 7-8 ліпеня, напярэдадні саміту NATO ў Вільні. Паводле дамовы, падпісанай міністрамі абароны дзвюх краінаў, кантроль за гэтай зброяй застанецца за Масквою.
Сяргей Крот belsat.eu
