Горад Севастопаль у анексаваным Расеяй Крыме ў ноч на 16 ліпеня зазнаў атаку беспілотнікаў. Пра гэта паведаміў у сваім тэлеграм-канале кіраўнік акупацыйнай адміністрацыі Міхаіл Разважаеў.
Паводле расейскага губернатара, беспілотнікі былі збітыя над морам у ваколіцах мысу Херсанес, Севастопальскай бухты, мысу Манганары і Балаклавы.
Агулам, паведаміў Міхаіл Разважаеў, былі знішчаныя дзевяць беспілотнікаў.
«Атака была масавай і працяглай. Па ўсіх мэтах нашы вайскоўцы адпрацавалі над морам і на падыходзе да бухтаў», – заявіў ён.
Разважаеў падкрэсліў, што ніякія аб’екты ні ў горадзе, ні ў акваторыі не пацярпелі.
Пры гэтым праўкраінскі тэлеграм-канал «Крымский ветер» адзначае, што расейскія войскі не здолелі збіць усіх беспілотнікаў. Паводле яго, атака на Севастопаль працягваецца.
Адзначым, што ў Крым, у лагер «Артэк», на адпачынак паслалі 33 беларускіх школьнікаў, якія перамаглі ў расейскіх конкурсах. Дзецям ад 12 да 17 гадоў.
Якуб Хруст belsat.eu
