«Белсат» падводзіць вынікі 631-х содняў поўнамаштабнай вайны, распачатай Расеяй ва Украіне. Пра галоўныя падзеі станам на вечар 16 лістапада чытайце ў нашым аглядзе.
У Генеральным штабе Збройных сілаў Украіны паведамілі пра адбіццё сямі атак праціўніка каля населеных пунктаў Сынькоўка, Петрапаўлаўка і Іванаўка на паўночным усходзе Харкаўскай вобласці.
Прарасейскі тэлеграм-канал «Два майора» гаворыць, што гэтых участках фронту ідуць баі мясцовага значэння. Між тым іншая крыніца – «Харьковское направление», сцвярджае, што расейцы прарвалі абарону ЗСУ ў ваколіцах Іванаўкі.
Адзначаецца, што прасоўванне адбылося пасля артылерыйскага ўдару, і цяпер баі ідуць на паўднёвым захадзе ад сяла. Такім чынам УС РФ перарэзалі дарогу на Кіслоўку і падышлі да чыгуначнай лініі.
У Міністэрстве абароны РФ заявілі, што самыя ўкраінцы на купянскім кірунку тройчы атакавалі каля населеных пунктаў Сынькоўка і Загаруйкаўка, але поспеху не дасягнулі.
На суседнім ліманскім кірунку фіксуюцца баі каля сёлаў Надзея і Дзіброва ў Луганскай вобласці. Зменаў па лініі фронту не зафіксавана.
У ваколіцах Бахмуту ініцыятыва за Узброенымі сіламі РФ, якія, паводле Генштабу ЗСУ, цягам дня шэсць разоў атакавалі каля сёлаў Клішчыеўка і Андрэеўка, але паўсюль былі спыненыя сіламі абароны Украіны.
Разам з тым асобныя крыніцы пішуць пра актывізацыю ўкраінскіх вайскоўцаў на поўдні кірунку ў ваколіцах гораду Горлаўка. Мяркуецца, што такім чынам ЗСУ адцягваюць сілы праціўніка з суседняга аўдзееўскага кірунку.
Актыўнасць ЗСУ ўскосна пацвярджае штодзённая зводка ад Мінабароны РФ, у якой гаворыцца пра 14 атак украінцаў у цэнтральнай і паўночнай частках Данецкай вобласці.
На самім аўдзееўскім кірунку працягваецца наступальная аперацыя УС РФ, якія імкнуцца атачыць аднайменны горад.
Украінскае камандаванне піша пра 18 няўдалых атак праціўніка каля населеных пунктаў Новакалінавае, Аўдзееўка і Первамайскае. Між тым аналітыкі праекту Deepstate паведамляюць аб прасоўванні расейцаў каля Новакалінавага.
Расейскі ваенкор Сямён Пегаў фіксуе поспехі войскаў РФ каля сяла Стэпавое і Аўдзееўскага коксахімічнага заводу. Прарасейскі тэлеграм-канал «Фронтовая птичка» удакладняе, што ў ваколіцах Стэпавога прасоўванні адбыліся на поўначы і паўночным захадзе ад сяла.
На захадзе ад Данецку расейцы вядуць штурмавыя дзеянні каля населеных пунктаў Мар’інка і Новаміхайлаўка, але поспеху не маюць: тут за содні ўкраінскія вайскоўцы адбілі 22 атакі праціўніка.
На поўдні Данецкай вобласці Збройныя сілы Украіны адбілі шэсць атак праціўніка каля сёлаў Прачыстаўка і Старамаёрскае. Адсутнасць зменаў па фронце на бярдзянскім кірунку фіксуе і Сямён Пегаў.
На мелітопальскім кірунку расейцы штурмавалі пазіцыі ЗСУ каля сяла Навадараўка ў Запарожскай вобласці, але прасунуцца не здолелі. Самыя ўкраінцы атакуюць каля сёлаў Работына і Вэрбовае – таксама без поспеху.
Акрамя гэтага працягваюцца баі каля сяла Пяціхаткі.
На херсонскім кірунку ідуць сустрэчныя баі на левым беразе Дняпра каля населеных пунктаў Пойма, Пішчанаўка і Крынкі.
У тэлеграм-канале 46-й аэрамабільнай брыгады ЗСУ пішуць, што сілы абароны краіны пакінулі частку невялікіх плацдармаў на левабярэжжы, паколькі іх утрыманне не мела практычнага сэнсу.
На іншых участках фронту адзначаюцца лакальныя пазіцыйныя баі, а таксама артылерыйскія абстрэлы ўздоўж лініі сутыкнення.
Ва ўмовах актыўных баявых дзеянняў журналісты не маюць магчымасці аператыўна правяраць афіцыйныя паведамленні ўдзельнікаў вайны.
Наталля Кулыгіна belsat.eu