«Белсат» працягвае расказваць пра рэпрэсіі беларусаў, якія чыніць рэжым Лукашэнкі. Сабралі факты пераследу, пра якія стала вядома 17 ліпеня.
У Беларусі восем новых палітвязняў. Гэта Сяргей Кемеж, Кацярына Леў, Дзяніс Салагуб, Алег Кардаш, Дзмітрый Утоўка, Святлана Баканава, Вадзім Каўшоў, Наталля Чавусава. Усяго палітвязнямі ў Беларусі прызнаныя 1487 чалавек.
Сілавікі затрымалі студэнтку 4 курсу юрыдычнага факультэту і абвінавацілі яе ў тым, што яна выкарыстоўвала ў дыпломнай працы «экстрэмісцкія крыніцы». У выніку гэтага яе адлічылі з універсітэту. Пазней затрымалі і аўтарку дыплому, у якой дзяўчына замовіла працу. За распаўсюд «экстрэмісцкіх»матэрыялаў ёй прысудзілі содні арышту.
У Менску 17 ліпеня затрымалі журналіста Ігара Карнея. Спачатку дачка Карнея распавядала, што яго арыштавалі на 10 содняў і адправілі на Акрэсціна. Удома ў журналіста прайшоў ператрус. Пазней стала вядома, што супраць яго распачалі крымінальную справу.
ГУБАЗіК затрымаў двух жыхароў Менску за ўдзел у пратэстах. Падчас затрымання сілавікі здзекаваліся: аднаго з іх паставілі на калені, апранулі кайданкі, абгарнулі ў бчб-сцяг, а на галаву паклалі прэзерватывы.
За ўдзел у акцыі пратэсту ў Менску ў 2020 годзе асудзілі Аляксея Скірду паводле ч. 1 арт. 342 КК. Справу разглядала суддзя Марына Клімчук. Суд прызначыў яму пакаранне ў выглядзе абмежавання волі без накіравання ў папраўчую ўстанову адкрытага тыпу тэрмінам на два гады і шэсць месяцаў.
У Менскім гарадскім судзе 10 ліпеня пачалі судзіць 34-гадовага палітзняволенага жыхара Чыжоўкі Яўгена Верхаводкіна. Яго затрымалі падчас «хапуна» ў Чыжоўцы ў снежні 2022 года і змясцілі пад варту паводле арт. 342 КК за ўдзел у акцыях пратэсту. Аднак цяпер яго судзяць за «заклікі да санкцыяў» (ч. 3 арт. 361 КК) і «стварэнне экстрэмісцкага фармавання ці ўдзел у ім» (ч. 1 арт. 361-1 КК). Яўгену пагражае да 12 гадоў калоніі.
Алена Рувіна belsat.eu