Аб’яднаны пераходны кабінет падвёў вынікі працы за першыя сто дзён і распавёў пра далейшыя планы

Аб’яднаны пераходны кабінет Беларусі выпусціў прэс-рэліз да першых ста дзён сваёй дзейнасці і распавёў, што атрымалася зрабіць за гэты перыяд. Таксама Кабінет падзяліўся бліжэйшымі планамі на паўгода. З поўнай версіяй справаздачы Кабінету можна азнаёміцца па спасылцы.

Пераходны кабінет выдзеліў чатыры напрамкі сваёй дзейнасці:

• Абарона і аднаўленне законнасці
• Міжнародны ціск на рэжым і стварэнне новых магчымасцяў для дэмакратычных сілаў
• Падрыхтоўка транзітнага перыяду
• Нацыянальнае адраджэнне Беларусі

Цяпер Кабінетам выбудоўваюцца адносіны ў галіне ваенна-палітычнага супрацоўніцтва з ключавымі міжнароднымі партнёрамі. Утворана і функцыянуе сістэма падрыхтоўкі ўдзельнікаў мерапрыемстваў па аднаўленні законнасці ў Беларусі і абароне яе незалежнасці, наладжана працэдура верыфікацыі ўдзельнікаў. Кансалідацыя і навучанне ўдзельнікаў вядзецца ў «Харугвах» – добраахвотных аб’яднаннях беларусаў.

Таксама наладжваецца сістэма матэрыяльна-тэхнічнага забеспячэння дзейнасці беларускіх добраахвотнікаў ва Украіне і рэгулярных трэніровачных збораў «Харугваў».

Кіраўніца Кабінета Святлана Ціханоўская інфармуе прадстаўнікоў замежных краін пра заснаванне Кабінета і яго асноўныя мэты на ключавых міжнародных форумах і падчас афіцыйных сустрэч высокага ўзроўню. Іншыя прадстаўнікі Кабінету таксама ўдзельнічалі ў буйных міжнародных і нацыянальных палітычных форумах і правялі шэраг афіцыйных сустрэч.

У Бруселі заснавана місія дэмакратычнай Беларусі, узначаленая намеснікам прадстаўніка па замежных справах Кабінета Уладзімірам Астапенкам, заснаваны Офіс дэмакратычных сіл Беларусі ў Празе, чакаецца адкрыццё такіх прадстаўніцтваў у іншых краінах.

Адным з прыярытэтных напрамкаў развіцця міжнародных адносінаў стала наладжванне афіцыйных сувязяў з уладамі Украіны.

Намеснік кіраўніцы Кабінета Павел Латушка разам са сваёй камандай працягнуў працу, накіраваную на актывізацыю міжнародных расследаванняў злачынстваў беларускіх сілавікоў у межах універсальнай юрысдыкцыі. Прадстаўнік па аднаўленні законнасці і правапарадку Аляксандр Азараў і арганізацыя «BYPOL» актыўна здабываюць інфармацыю пра адказных за рэпрэсіі і склад здзейсненых злачынстваў.

За мінулы перыяд удалося арганізаваць і запусціць кампанію «Кадравы рэзерв для новай Беларусі», які прадугледжвае падбор і якасную падрыхтоўку кіраўнічых кадраў для цэнтральных і мясцовых органаў улады для новай Беларусі.

Прадстаўніца па нацыянальным адраджэнні Аліна Коўшык здолела наладзіць працоўныя адносіны з найбольш буйнымі беларускімі незалежнымі культурніцкімі ініцыятывамі і экспертнай супольнасцю ў галіне культуры і адукацыі, як за межамі, так і ўнутры Беларусі.

А вось якія планы Кабінета на бліжэйшыя 6 месяцаў:

• Працяг працы па легітымізацыі Кабінета на міжнароднай палітычнай арэне. Наладжванне ўстойлівых працоўных адносінаў з дзяржаўнымі органамі ўлады Украіны з мэтай сумеснага супрацьстаяння расейскай агрэсіі і дэакупацыі Беларусі.
• Далейшая кансалідацыя дэмакратычных сілаў Беларусі, наладжванне супрацоўніцтва са згуртаваннямі беларускіх добраахвотнікаў ва Украіне, прыцягненне да працы ў Кабінеце новых спецыялістаў. Нарошчванне патэнцыялу сілавога блока да ўзроўню, неабходнага для выканання ключавых задач.
• Працяг санкцыйнага ціску на рэжым і яго прадстаўнікоў. Дапрацоўка плана дзеянняў на транзітны перыяд.
• Далейшая акумуляцыя міжнароднай падтрымкі Беларусі з выкарыстаннем новых магчымасцяў: прадстаўніцтва ў Радзе Еўропы, працы прадстаўніцтваў дэмакратычных сілаў у краінах ЕЗ і Украіне.
• Актывізацыя расследаванняў крымінальных спраў у рамках універсальнай юрысдыкцыі.
• Прызначэнне прадстаўніка па фінансах і эканоміцы і прадстаўніка па сацыяльных пытаннях. Пошук крыніц устойлівага фінансавання дзейнасці Кабінета.

Алена Рувіна belsat.eu