8 лістапада ў судзе Цэнтральнага раёну Гомля разглядалі адміністратыўную справу ў дачыненні Аляксандра Канеўскага, сына палітзняволенай гомельскай актывісткі Таццяны Канеўскай, паведамляе «Гомельская вясна».
Справу вяла суддзя Алеся Восіпава. Яна прызнала Аляксандра Канеўскага вінаватым паводле ч. 2 арт. 19.11 КаАП РБ «Распаўсюд інфармацыйнай прадукцыі, залучанай у Рэспубліканскі спіс экстрэмісцкіх матэрыялаў, а таксама выраб, выданне, захоўванне або перавоз з мэтаю распаўсюду такой інфармацыі».
У пастанове суда ў віну Аляксандру ставіцца тое, што «ў мэсэнджары Telegram шляхам адпраўкі асабістага паведамлення ажыццявіў распаўсюд інфармацыйнай прадукцыі ў выглядзе артыкулу з суполак, залучаных у Рэспубліканскі спіс экстрэмісцкіх матэрыялаў».
Мужчыну пакаралі 15 соднямі арышту.
Маці Аляксандра, Таццяна Канеўская, ужо трэці год застаецца за кратамі. Жанчыну затрымалі яшчэ да выбараў, 6 жніўня 2020 года. У траўні 2021-га яе засудзілі да 6 гадоў калоніі за ўдзел у масавых закалотах (ч. 2 арт. 293 КК РБ) і захоп будынкаў і збудаванняў (арт. 292 КК). Таццяна была даверанай асобаю Святланы Ціханоўскай у Гомлі. Акрамя таго, жанчына ўваходзіла ў Матчын рух 328. У 2019 годзе балатавалася на парламенцкіх выбарах.
У Таццяны Канеўскай чацвёра сыноў. Самаму малодшаму, Георгію, на момант затрымання маці было 12 гадоў. Пацярпелі ад рэпрэсіяў і яшчэ два сыны: Дзмітрыя затрымалі ў пачатку 2021 года і засудзілі на тры гады калоніі за распальванне варожасці (арт. 130 КК РБ), ён цалкам адбыў тэрмін пакарання і выйшаў на волю ў сярэдзіне кастрычніка 2023 года, Аляксея затрымлівалі і кідалі за краты на содні.
Марыя Міхалевіч belsat.eu
