18 сакавіка прэзідэнт Расейскай Федэрацыі Уладзімір Пуцін наведаў Крым – ён прыехаў на адкрыццё дзіцячай школы мастацтваў на тэрыторыі гісторыка-археалагічнага парку Херсанэс Таўрыцкі, паведамляюць расейскія СМІ.
Паводле прызначанага Расеяй губернатара Севастопаля Міхаіла Разважаева, прыезд Пуціна ў Крым быў нечаканым – раней паведамлялася, што на адкрыцці школы мастацтваў ён будзе прысутны па відэасувязі. Аднак прэзідэнт РФ вырашыў прыехаць асабіста. Разважаеў падкрэслівае, што сам вёў аўтамабіль, на якім і прывёз Пуціна ў Крым.
Гэта першы візіт Пуціна ў Крым за паўтара года – апошні раз ён наведваў паўвостраў у лістападзе 2021 года.
18 сакавіка 2014 года ў Крамлі была падпісаная «Дамова аб прыняцці Рэспублікі Крым у склад РФ».
17 сакавіка 2023 года Міжнародны крымінальны суд выпісаў ордэр на арышт Уладзіміра Пуціна.
Марыя Міхалевіч belsat.eu
