У Вярхоўнай Радзе Украіны разгледзяць магчымасць падоўжыць вайсковае становішча ў краіне. Прэзідэнт Украіны Уладзімір Зяленскі ўнёс на разгляд адпаведную прапанову. Пра гэта паведамляе сайт Вярхоўнай Рады Украіны.
У час ваеннага становішча ў краіне дапускаецца асаблівы рэжым заезду і выезду, абмяжоўваецца свабода перасоўвання грамадзянаў, іншаземцаў і асобаў без грамадзянства, а таксама рух транспартных сродкаў. Прызначаецца каменданцкая гадзіна.
Указ аб увядзенні ваеннага становішча прадугледжвае забарону на дзейнасць некаторых палітычных партыяў ці грамадскіх аб’яднанняў, што вядуць працу супраць незалежнасці Украіны.
Разам з тым у краіне будзе падоўжаная мабілізацыя мужчынаў для службы ў ЗСУ. Аднак яна будзе насіць абіральны характар, бо, са словаў начальніка ўпраўлення штабу ЗСУ, войска Украіны цяпер укамплектаванае на 100 %.
Нагадаем, што 24 лютага Уладзімір Зяленскі сваім указам увёў ваеннае становішча ў сувязі з пачаткам поўнамаштабнага ўварвання Расеі ва Украіну. Пасля гэтага Вярхоўная Рада некалькі разоў працягвала тэрмін дзеяння ваеннага становішча. Пакуль ва Украіне яно дзейнічае да 25 траўня.
Раман Лугоўскі belsat.eu
