За мінулыя содні расейскія войскі пашкодзілі інфраструктуру больш чым 30 населеных пунктаў Украіны. Сярод іх Мікалаеў, Запарожжа, Салядар, Белагорʼе, Навапіль, Першатраўнева і іншыя. Аб гэтым паведамляе ў ранішняй зводцы Генштаб ЗСУ.
Паводле падлікаў украінскага боку, за мінулыя содні расейскія войскі нанеслі тры ракетныя ўдары і 22 авіяўдары, зрабілі больш за 90 удараў з рэактыўных сістэмаў залпавага агню па абʼектах на тэрыторыі Украіны. З пачатку дня 19 верасня расейскія войскі нанеслі яшчэ тры ракетныя ўдары.
«Праціўнік працягвае абстрэлы дамоў мірных жыхароў і абʼектаў цывільнай інфраструктуры, парушаючы нормы міжнароднага гуманітарнага права, законы і звычаі вайны», – гаворыцца ў паведамленні Генштабу ЗСУ.
Расейскія войскі працягваюць засяроджваць свае намаганні на спробах поўнага захопу Данецкай вобласці, арганізацыі абароны і ўтрымання захопленых тэрыторыяў, а таксама зрыву актыўных дзеянняў украінскіх сілаў абароны на асобных участках. Яны абстрэльваюць пазіцыі ўкраінскіх войскаў уздоўж лініі судакранання, праводзяць перагрупоўванне падраздзяленняў на асобных кірунках, уводзяць рэзервы і не спыняюць вядзення паветранай выведкі.
Таксама Генштаб ЗСУ паведамляе, што «ў сувязі са значным недахопам як людскіх, так і матэрыяльных рэсурсаў расейскія войскі працягваюць выкарыстоўваць нестандартныя спосабы іх папаўнення». Напрыклад, з расейскага Тамбова на ўзмацненне частак, якія ваююць ва Украіне, былі накіраваныя 400 чалавек, якія адбываюць пакаранне за крымінальныя злачынствы. У Краснадарскім краі грамадскія арганізацыі воінаў-афганцаў атрымалі заданне збіраць з мясцовага насельніцтва грошы на набыццё цёплых рэчаў для рэгіянальнага добраахвотніцкага батальёну.
За мінулыя содні падраздзяленні ўкраінскіх Сілаў абароны адбілі атакі расейскіх падраздзяленняў у ваколіцах населеных пунктаў Мікалаеўка Другая, Вясёлая Даліна і Бахмут. За содні ўкраінская авіяцыя нанесла 21 удар, пацверджанае пашкоджанне 16 раёнаў канцэнтрацыі жывой сілы і апорных пунктаў расейскіх войскаў і пяці пазіцыяў зенітных ракетных комплексаў.
За мінулыя содні ўкраінскія ракетныя войскі і артылерыя абстралялі больш за 14 абʼектаў расейскіх войскаў. У прыватнасці, нанесеныя ўдары па шасці пунктах кіравання, трох апорных пунктах і раёнах засяроджвання асабовага складу і вайсковай тэхнікі. У зону паражэння трапілі абʼекты супрацьпаветранай абароны, радыёэлектроннай барацьбы і тры склады боепрыпасаў. Агульныя страты расейскіх войскаў удакладняюцца.
Антон Тачняк belsat.eu
