Цяпер нам усім не стае добрых навінаў, таму мы надумалі сабраць гісторыі з добрымі ўчынкамі і станоўчымі падзеямі.
У Турцыі на 13-ы дзень пасля землятрусу з-пад завалаў жывымі дасталі бацькоў ды іхнага 12-гадовага сына. Але хлопчык, на жаль, пазней памёр.
296 гадзінаў – столькі бацькі і падлетак правялі пад руінамі шматкватэрнага дому ў правінцыі Хатай.
Таксама праз 10 дзён пасля землятрусу пад заваламі знайшлі жывымі яшчэ трох чалавек. 17-гадовую Алейну Эльмэз назвалі цуда-дзяўчынаю, калі яе выцягнулі жывой з-пад абломкаў. Гэты момант вы бачыце на відэа.
#TurkeySyriaEarthquake2023
More miracles 🙏🏻
Aleyna Ölmez 17-year-old girl was pulled out alive in #Turkey 🇹🇷 from under the rubble of her apartment after 248 hours (more than 10 days) of the deadly earthquake in #Kahramanmaraş #GodHelpTurkeyAndSyria pic.twitter.com/SHLzQfSIYB— Rula El Halabi (@Rulaelhalabi) February 16, 2023
Пазней знайшлі 30-гадовую Нэсліхан Кылыч і 12-гадовага хлопчыка Асмана. Сама меней 43 885 чалавек загінулі ў Турцыі і суседняй Сірыі ў выніку магутнага землятрусу 6 лютага магнітудаю 7,8.
Джульет Ламур з Канады ў 5 гадоў даведалася пра землятрус у Гаіці, які забраў жыцці дзясяткаў тысячаў чалавек. Большая частка краіны тады засталася ў руінах. Аддзяленне канадскага Чырвонага Крыжа збірала ў родным горадзе дзяўчынкі ахвяраванні. Джульет прынесла сваю скарбонку. Там быў 61 канадскі долар.
Цяпер ёй 18 гадоў, і яна купіла свой першы латарэйны білет, які прынёс ёй $ 48 мільёнаў.
Жонка ветэрана Другой сусветнай вайны дзесяцігоддзе шукала японскую сямʼю, каб вярнуць ім фотаальбом, які ейны муж знайшоў у Японіі ў 1945 годзе.
У 1945 годзе салдаты ЗША высадзіліся на пляжах Окінавы на завяршальным этапе вайны ў Ціхім акіяне. Амерыканец Ўайдэн убачыў сярод аскепкаў чорны фотаальбом са здымкамі японскай сямʼі. І захацеў яе знайсці.
Пасля ягонай смерці жонка Кэралін, малодшы сын Кен і ягоная кітайская сяброўка пачалі пошукі.
«Кітайская і японская мовы дастаткова блізкія лінгвістычна, таму яна магла сёе-тое перакласці для мяне», – расказала Кэралін.
Вырашальную ролю ў гісторыі сыгралі лагатыпы на футболках. Незнаёмыя людзі ў Японіі даведаліся пра пошукі і дапамаглі знайсці гаспадароў альбому.
Фотаальбом належаў сямʼі Сунабэ. Амерыканскія вайскоўцы знішчылі іхны горад, і цяпер там месціцца амерыканская вайсковая база. Старэйшая ў сямʼі цяпер 83-гадовая Іха Сунабэ, яна адзіная застала вайну. Сямʼя Ўайдэнаў паехала ў Японію, каб вярнуць альбом.
І дзве сямʼі зрабілі ўжо новую фатаграфію разам.
За жыццём Мітгілеша Бэкпэкера ў Беларусі сочыць амаль 1 мільён падпісчыкаў на YouTube. На дні народзінаў сябра ў Беларусі Мітгілеш пазнаёміўся з Лізаю, неўзабаве яны ажаніліся, і Ліза зацяжарала.
У сваім блогу мужчына распавёў пра штомесячныя выплаты цягам трох гадоў пасля нараджэння дзіцяці. І відэа з аповедам пра беларускія дэкрэтныя выплаты зрабілася вірусным.
Пра мужчыну пачалі пісаць:
«Мужчына індыйскага паходжання атрымаў ад Беларусі 128 тысяч рупіяў пасля шлюбу» – змест загалоўкаў прыкладна такі.
Нядаўна ў Беларусь прыехаў бацька Мітгілеша знаёміцца з унукам і сям’ёю Лізы.
Трэці год запар дзеці, якія ляжаць у шпіталі Каларада, могуць намаляваць сваю версію ідэальнай снежнай бабы, а людзі робяць гэтыя малюнкі са снегу.
І вы можаце ўзяць удзел да канца сакавіка. Дастаткова толькі запоўніць форму, і вам падбяруць дзіця, у якога ёсць класная ідэя снежнай бабы. І яно спадзяецца, што вобраз ператворыцца ў жыццё.
Аліса Ганчар belsat.eu