У новым навучальным годзе ва ўсіх вышэйшых навучальных установах Беларусі, незалежна ад профілю, уводзяцца тры абавязковыя дысцыпліны: «Гісторыя беларускай дзяржаўнасці», «Сучасная палітэканомія» і «Філасофія», паведаміў міністр адукацыі Андрэй Іванец.
Пра новыя прадметы міністр адукацыі распавёў падчас выступу перад моладдзю на базе 51-й гвардзейскай артылерыйскай брыгады ў клубе вайсковай часткі № 12147. Паводле чыноўніка, новаўвядзенні ў навучальную праграму маюць на мэце фармаваць у студэнтаў панятку пра прычынна-выніковыя сувязі тых ці іншых падзеяў.
«Студэнты 1 курсу будуць мець магчымасць вядомыя гістарычныя факты разгледзець менавіта з пункту погляду грамадска-палітычных падзеяў, якія адбываліся на тэрыторыі сучаснай Беларусі, даць ацэнку, якую ролю гэтыя падзеі сыгралі ў станаўленні беларускай дзяржаўнасці, які ўнёсак зрабілі ў станаўленне незалежнай Беларусі», – сказаў Іванец.
ГГ, belsat.eu
