У Беларусі дазволілі прадаваць лекі ў інтэрнэце. Якія і на якіх умовах

Міністэрства аховы здароўя зацвердзіла інструкцыю пра парадак рознічнага гандлю лекамі праз інтэрнэт. Пастанова №69 ад 3 траўня была афіцыйна апублікаваная на Нацыянальным прававым інтэрнэт-партале 20 траўня. Дакумент набывае моц пасля афіцыйнай публікацыі.

Паводле пастановы, прадаваць лекі ў інтэрнэце могуць юрыдычныя асобы, што маюць ліцэнзію на фармацэўтычную дзейнасць, якая дазваляе раздробны гандаль лекаў дыстанцыйным спосабам. Спіс юрасобаў, якія прадаюць лекі, сфармуе і размесціць на сваім сайце Дзяржфармнагляд.

Юрасобы могуць прадаваць лекі праз інтэрнэт-аптэку на ўласным сайце. Пры гэтым продаж уключае фармацэўтычнае кансультаванне спажыўца, прыём заказаў, іх фармаванне, захоўванне і дастаўку спажыўцу.

Прадаваць праз інтэрнэт можна безрэцэптурныя лекі, уключаныя ў адпаведны пералік Міністэрства аховы здароўя, акрамя тых, у якіх доля этылавага спірту перавышае 25%.

Таксама прадавец павінен размясціць на сайце звесткі пра юрыдычную асобу, наяўнасць ліцэнзіі, рэжым працы інтэрнэт-аптэкі і г. д. А на галоўнай старонцы інтэрнэт-аптэкі павінны знаходзіцца:

• звесткі пра лекі, якія падлягаюць рознічнай гандлю ў інтэрнэце (назва, найменне вытворцы, тэрмін прыдатнасці, колькасць, рознічная цана, умовы захоўвання, інструкцыя ўжывання);
• умовы і спосабы набыцця і аплаты лекаў;
• спосабы і тэрміны;
• кошт і ўмовы аплаты дастаўкі;
• звесткі пра ўмовы, тэрміны і парадак скасавання дамовы;
• звесткі пра правы спажыўца і абавязкі юрасобы;
• звесткі пра месца знаходжання кнігі заўваг і прапаноў, нумар тэлефона, адрас электроннай пошты асобы, упаўнаважанай разглядаць звароты спажыўцоў аб парушэнні іх правоў;
• узоры плацежных дакументаў, якія пацвярджаюць прыём ад спажыўца наяўных грошай.

Для дастаўкі лекаў можна выкарыстоўваць уласную службу дастаўкі юрыдычныя асобы або кур’ерскую арганізацыю.

Якуб Хруст belsat.eu