У Беларусі падвялі вынікі штогадовага рэспубліканскага агляду санітарнага стану і добраўпарадкавання населеных пунктаў, які праходзіў у 2022 годзе. Адпаведную пастанову прэм’ер-міністра Рамана Галоўчанкі апублікавалі 20 траўня на Нацыянальным прававым інтэрнэт-партале. Пераможцы атрымаюць пераходны вымпел і грашовы прыз з рэспубліканскага бюджэту.
Сярод сталіцы і абласных цэнтраў пераможцам стаў Берасце, які набраў 305 балаў. У якасці прыза мясцовыя ўлады атрымаюць 296 тысяч рублёў.
З гарадоў з насельніцтвам ад 50 тыс. жыхароў найлепшымі прызнаныя Мазыр (233 балы) і Бабруйск (231 бал). Ім дадуць па 111 тысяч рублёў.
Сярод населеных пунктаў з насельніцтвам ад 10 да 50 тыс. жыхароў тытул пераможцаў атрымалі Жабінка (262 балы), Маларыта (252) і Глыбокае (236). Ім дадуць па 74 тысячы рублёў.
Найлепшымі сярод гарадоў і гарадскіх пасёлкаў з насельніцтвам да 10 тыс. жыхароў сталі Брагін (230), Бялынічы (230), Чэрыкаў (216) і гарадскі пасёлак Антопаль Драгічынскага раёну (225). Іх прыз – 55,5 тысячы рублёў.
На сяле пераможцамі сталі вёскі Махро (181) і Ляскавічы (168) Іванаўскага раёну, аграгарадок Дабрамыслі (169) Лёзненскага і аграгарадок Ахрэмаўцы (159) Браслаўскага раёну, а таксама населены пункт Атар (164) Чачэрскага раёну. Ім дадуць па 29,6 тысячы рублёў.
Таксама ўлады адзначылі значны ўклад у павышэнне ўзроўню добраўпарадкаванасці гарадоў Бяроза, Петрыкаў, Кобрын, Полацк, Ворша, гарадскіх пасёлкаў Янавічы Віцебскага раёну, Целяханы Івацэвіцкага, Вялікая Бераставіца Бераставіцкага, аграгарадкоў Гарбаха Іванаўскага раёну, Вішоў Бялыніцкага і Туголіца Бабруйскага.
Падчас ацэнкі населеных пунктаў ацэньваюць, сярод іншага, якасць дарожнага пакрыцця, плошчу зялёных насаджэнняў на аднаго жыхара, колькасць спартовых пляцовак, забяспечанасць прыбіральнямі, ахоп раздзельным зборам смецця, добраўпарадкаванне могілак і нават колькасць праведзеных суботнікаў.
Якуб Хруст belsat.eu
