У сталіцы Латвіі 21 траўня стартуе чэмпіянат свету па хакеі. Першапачаткова турнір павінен быў прайсці ў Рызе і Менску, аднак рада Міжнароднай федэрацыі хакею пастанавіла пазбавіць Беларусь права правядзення чэмпіянату ў 2021 годзе праз небяспечную сітуацыю ў краіне.
У дзень адкрыцця каманда Беларусі згуляе са зборнаю Славаччыны. Сустрэча пачнецца а 20:15 паводле беларускага часу.
Расклад матчаў можна адсочваць на афіцыйнай старонцы Міжнароднай федэрацыі хакею.
У групе А згуляюць зборныя Швецыі, Чэхіі, Швейцарыі, Славаччыны, Даніі, Беларусі, Вялікай Брытаніі ды Алімпійскага камітэту Расеі, спартоўцы якога будуць выступаць пад нейтральным сцягам на чэмпіянатах свету і Алімпіядах праз антыдопінгавы скандал да снежня 2022 года.
У групе B будуць супернічаць Канада, Фінляндыя, ЗША, Нямеччына, Латвія, Нарвегія, Італія і Казахстан.
У чвэрцьфінал выйдуць найлепшыя чатыры каманды з кожнай групы.
На фоне пратэстаў у Беларусі Кабінет міністраў Латвіі ў пачатку верасня 2020 года звярнуўся ў Міжнародную федэрацыю хакею з просьбаю дазволіць правесці чэмпіянат свету з іншаю краінаю замест Беларусі. Пазней, 17 верасня, Еўрапейскі парламент прыняў рэзалюцыю «Сітуацыя ў Беларусі», у якой таксама заклікаў не праводзіць частку чэмпіянату свету па хакеі з шайбаю 2021 года ў Менску.
У студзені кампаніі «Škoda Holding» і «Nivea» заявілі пра адмову спансараваць чэмпіянат у выпадку яго правядзення ў Беларусі. Пазней да байкоту спонсараў ЧС далучыўся брэнд «Liqui Moly».
Пасля шматлікіх абмеркаванняў і збораў подпісаў 18 студзеня 2021 года сябры рады IIHF канчаткова пастанавілі перанесці чэмпіянат з Беларусі праз «немагчымасць запэўніць бяспеку камандаў, гледачоў і афіцыйных асобаў пры правядзенні чэмпіянату свету ў Беларусі».
У выніку чэмпіянат перанеслі ў Рыгу цалкам.
АД, belsat.eu
