Нобэлеўскі лаўрэат Святлана Алексіевіч падчас візіту ў Літву распавяла пра сваё бачанне вайны ва Украіне і заклікала краіны Захаду дапамагаць украінцам у барацьбе з агрэсіяй Крамля, піша Delfi.
Падчас візіту ва ўніверсітэт Вітаўта Вялікага ў Каўнасе, нобэлеўскі лаўрэат Святлана Алексіевіч атрымала рэгаліі ганаровага доктара. Беларуская пісьменніца адказала таксама і на пытанні журналістаў. Асноўныя моманты размовы – гэта вайна ва Украіне.
«Я думаю, што вайна будзе яшчэ даўжэй, і нашая дапамога, дапамога Захаду павінна быць яшчэ большай. Таму што Расея ж – велізарная краіна. Што значыць мабілізацыя? Гэта якая велізарная колькасць людзей. І не відаць, каб у Расеі нешта адбылося, нейкі рэвалюцыйны пераварот, пакуль гэтага не бачна», – сказала Святлана Алексіевіч.
На пытанне, ці спадзяецца пісьменніца, што сітуацыя ў Беларусі зменіцца, яна адказала, што ў аўтарытарных рэжымаў не атрымаецца «спыніць час».
«Вядома, гэта будзе, яны не змогуць спыніць час. Гэта ім так здаецца, дыктатарам, што яны могуць спыніць час. Час нельга спыніць. Але ў сённяшні момант усё залежыць ад таго, што будзе ва Украіне. Мы ўсе павінныя дапамагаць Украіне, мы павінны перамагчы Пуціна», – сказала Святлана Алексіевіч.
Па словах пісьменніцы, яна не ведае, што трэба зрабіць, каб змянілася і расейскае грамадства, якое з-за прапаганды, якая вядзецца ўжо шмат гадоў, давярае свайму кіраўніцтву.
«Я шмат ездзіла па Расеі. І як быццам спіць народ, як быццам ён перакормлены гэтым тэлебачаннем. Тое, што людзі кажуць, у гэта нават не верыцца. Я памятаю – бамбуюць Харкаў, сціраюць з твару зямлі, а жанчына кажа: так, у мяне там жыве сястра, яе дом разбамбілі, але я ўсё роўна веру ў нашага прэзідэнта», – распавяла Алексіевіч.
Паводле словаў нобэлеўскага лаўрэата, Пуцін цяпер уклаў шмат сродкаў у прапаганду. Народ у выніку пачаў верыць таму, што кажуць з экранаў тэлебачання.
Алена Аляксандрава belsat.eu
