У выніку баявых дзеянняў у Нагорным Карабаху 19–20 верасня загінулі не менш за 200 чалавек. Сярод іх 10 мірных жыхароў, з якіх 5 дзяцей, заявіў омбудсман непрызнанай рэспублікі Арцах Гегам Стэпаньян.
Колькасць пацярпелых праз абвастрэнне канфлікту вырасла да 400 чалавек. Больш за 40 чалавек – гэта мірнае насельніцтва, у тым ліку параненыя 13 дзяцей.
❗️As of 21:30, September 20, according to the information collected by the Office of the Human Rights Defender, there are at least 200 deaths and more than 400 wounded persons.
The number of injured people among the civilian population exceeds 40 persons, among whom 13 are…— Artsakh / Nagorno-Karabakh Human Rights Ombudsman (@ArtsakhOmbuds) September 20, 2023
Азербайджан афіцыйна пацвердзіў толькі гібель адной цывільнай асобы ў Шушы, паведамляюць «Важные истории».
Больш за 10 тысяч чалавек эвакуяваныя са сваіх родных населеных пунктаў, вымушаныя шукаць прытулак у іншых паселішчах Арцаху, дзе можа быць адносна бяспечна, паведаміў Гегам Стэпаньян.
«Сярод іх жанчыны, дзеці і пажылыя людзі, шмат хто з іх ужо некалькі разоў у сваім жыцці быў вымушаны пакінуць свае дамы праз азербайджанскую агрэсію. Адсутнасць паўнацэннага харчавання, лекаў, прадметаў гігіены – гэта нацыянальная катастрофа ў рэальным часе і грубае парушэнне ўсіх фундаментальных правоў чалавека», – напісаў Стэпаньян.
Таксама ён паведаміў, што ёсць тысячы людзей, якія да гэтага часу не могуць знайсці сваіх сваякоў і чальцоў сям’і.
У рэгіёне ўскладненая праца жыццёва важнай інфраструктуры, усё насельніцтва пазбаўленае доступу да электрычнасці, інтэрнэту і мабільнай сувязі ўжо цягам 35 гадзінаў. Людзі не могуць гатаваць, абагравацца ці заладоўваць свае гаджэты, застаючыся пры гэтым у халодных сутарэннях дзеля бяспекі, дадае омбудсман непрызнанай рэспублікі Арцах.
Нагадаем, 19 верасня Азербайджан пачаў «антытэрарыстычныя мерапрыемствы» ў Нагорным Карабаху, абвінаваціўшы Арменію ў размяшчэнні вайсковай тэхнікі і салдатаў на тэрыторыі спрэчнага рэгіёну. Аднак раней прэм’ер-міністр Арменіі Нікол Пашыньян прызнаў суверэнітэт Азербайджану над рэгіёнам. На наступны дзень канфлікт быў урэгуляваны: бакі дамовіліся аб спыненні агню. Згодна з пагадненнем, армянскія фармаванні, якія былі на тэрыторыі Нагорнага Карабаху, складаюць зброю і пакідаюць свае баявыя пазіцыі. Усе незаконныя фармаванні павінны быць расфармаваныя.
Алена Рувіна belsat.eu