Белстат на сваім сайце апублікаваў інфармацыю пра будаўніцтва жылля ў Беларусі ў студзені – лістападзе сёлета. За 11 месяцаў увялі ў эксплуатацыю крыху болей за 3 476 000 квадратных метраў. Летась было на 7,5 % больш.
Паводле Нацыянальнага статыстычнага камітэту, у студзені – лістападзе сёлета арганізацыі ўсіх формаў уласнасці пабудавалі больш за 39 000 кватэраў. Гэта амаль на 10 % меней, чымся за той жа час летась.
Агулам уведзена ў эксплуатацыю сёлета 3 476 500 квадратных метраў жылля, што на 7,5 % меней, чым за студзень – лістапад летась.
У вёсках пабудавалі 1 031 000 квадратных метраў – гэта амаль 30 % ад аб’ёму цалкам па краіне.
42 % усяго пабудаванага жылля – для асобаў, якія стаяць у чарзе на паляпшэнне жыллёвых умоваў. Амаль усе гэтыя дамы і кватэры пабудавалі з дзяржаўным падтрыманнем.
Абʼёмы будаўніцтва ў Беларусі падаюць на фоне эканамічнага крызісу, падаражэння будаўнічых матэрыялаў і ад’езду будаўнікоў.
Сяргей Крот belsat.eu