У гадавіну пачатку паўстання Кастуся Каліноўскага абраная прэзідэнтка Беларусі Святлана Ціханоўская наведала могілкі Росы ў Вільні, дзе пахаваныя героі нацыянальна-вызвольнага паўстання, і выступіла з прамовай.
У Вільні з нагоды пачатку паўстання 1863-1864 гадоў адбылася ўрачыстая цырымонія. У Кафедральным саборы літоўскай сталіцы адбылася служба, выступілі палітыкі.
Абраная прэзідэнтка Святлана Ціханоўская наведала могілкі паўстанцаў Каліноўскага ў Росах і выступіла з прамовай.
«Каліноўскі, які кіраваў паўстаннем на тэрыторыі Беларусі, ёміста сфармуляваў нацыянальную ідэю Беларусі: толькі тады народзе зажывеш шчасліва, калі над табой не будзе чужой улады.
Бо нам, беларусам, не трэба чужога. Проста дайце нам быць гаспадарамі ў сваёй краіне. Мы хочам будаваць Беларусь свабоднай і незалежнай дзяржавай, і імя Кастуся Каліноўскага працягвае натхняць нас у гэтай справе.
У Менску мы з сям’ёй жылі ў раёне вуліцы Каліноўскага і часта там гулялі. Тады мае дзеці былі яшчэ маленькія і не ведалі, чым знакаміты Каліноўскі. Але нядаўна я распавяла старэйшаму гэтую гісторыю – пра тое, як адзін маленькі, але вольны душой чалавек змог запаліць іскру народа, каб паўстаць супраць вялікага зла. Нават калі ён трапіў за краты – ён не здаўся і заставаўся вольным чалавекам. «Ён такі ж, як наш тата!» – сказаў мой сын.
Я думаю, у кожнай беларускай сямʼі ёсць свой Каліноўскі – той, хто дае вам сілы на барацьбу і не дае спыніцца, нават калі здаецца, што ўжо няма надзеі. І нягледзячы на тое, што трагічная гісторыя паўтараецца, і сёння нашыя народы зноў вымушаныя супрацьстаяць вялізнай імперыі, – я ведаю, што мы пераможам. Ведаю, што ўсе мы вернемся дадому. І ведаю, што Беларусь у хуткім часе вернецца ў Еўрапейскую сямʼю, якой належыць гістарычна.
За нашую і вашу свабоду!»
Алена Аляксандрава belsat.eu