У судзе Маскоўскага раёну аднавіўся працэс над экс-кандыдатам на прэзідэнцтва Віктарам Бабарыкам.
Валанцёр штабу Бабарыкі Лявон Халатран прыйшоў сёння ў суд, каб падтрымаць абвінавачаных. Але на паседжанне яго не пусцілі, сказаўшы, што ў зале закончыліся месцы.
Халатран распавёў, што Віктар Бабарыка перадаў яму віншаванні з народзінамі ды што зняволены палітык моцна сумуе па добрай каве.
Амбасадар Аўстрыі Алёйзья Вёргетэр (Aloisia Wörgetter) прыйшла на суд у справе «Белгазпрамбанку».
Адвакат Бабарыкі Зміцер Лаеўскі распавёў, што настрой у Віктара Бабарыкі – выдатны. Ён рады бачыць людзей, якія змаглі трапіць у залу.
«Любы рух, нават рух у крымінальным працэсе, – гэта ўсё ж такі лепш, чым стан нявызначанасці, – кажа адвакат Зміцер Лаеўскі.
У судзе сёння зноў зачытваюць абвінавачанне. Імаверна, сёння яго нарэшце зачытаюць цалкам. Дзмітрый Лаеўскі адзначае, што пасля месяца перапынку працэс працягваецца ў звычайным фармаце, а вось у працы адвакатаў могуць узнікнуць перашкоды:
«З’явіўся праект нарматыўнага акту, які істотна ўскладніць працу і маю і працу маіх калегаў. І не толькі ў гэтай справе».
Віктар Бабарыка на леташніх прэзідэнцкіх выбарах спрабаваў стаць супернікам Аляксандра Лукашэнкі. Яго вінавацяць паводле ч. 3 арт. 430 («Атрыманне хабару ў асабліва буйным памеры») і ч. 2 арт. 235 («Легалізацыя («адмыванне») сродкаў, атрыманых злачынным шляхам») Крымінальнага кодэксу. Бабарыка віны не прызнае.
Працэс у «справе «Белгазпрамбанку» пачаўся 17 лютага. Справу разглядае Вярхоўны Суд у будынку суда Маскоўскага раёну.
МГМ belsat.eu