Мінабароны Расеі лічыць неактуальнымі межы ў Балтыйскім моры ад 1985 года і прапануе іх змяніць у аднабаковым парадку. Цяперашнія межы нібыта не адпавядаюць «геаграфічным абставінам».
Згодна з прапановай Мінабароны, мяжа Расеі мае быць пашыраная за кошт часткі акваторыі на ўсходзе Фінскай затокі, а таксама каля гарадоў Балтыйск і Зеленаградск у Калінінградскай вобласці.
Для гэтага збіраюцца абнавіць пералік пунктаў, ад якіх адмераюць шырыню паласы тэрытарыяльных водаў каля мацерыковай часткі і астравоў Расеі ў Балтыйскім моры.
«Простыя зыходныя лініі ў Фінскай затоцы не маюць працягу і не замыкаюцца на тэрыторыю Расейскай Федэрацыі, што, у сваю чаргу, не дазваляе вызначыць вонкавую мяжу ўнутраных марскіх водаў», – заяўляе Мінабароны.
МЗС Расеі даручылі даць на захоўванне генеральнаму сакратару ААН копіі змененых мапаў. Пакуль праект выстаўлены на грамадскае абмеркаванне, аднак ужо гаворыцца, што змены мусяць уступіць у сілу ў студзені 2025 года.
Арсен Рудэнка belsat.eu
