У судзе Ленінскага раёну Берасця зноў не змаглі пакараць берасцейскага краязнаўца і рэдактара газеты «Царква». Суддзя чарговы раз накіраваў справу Ігара Бараноўскага на дапрацоўванне.
На краязнаўцу Ігара Бараноўскага міліцыянты ў кастрычніку склалі два адміністратыўныя пратаколы паводле ч. 2 арт. 19.11 КаАП РБ («Распаўсюд, выраб, захоўванне, перавоз інфармацыйнай прадукцыі, якая змяшчае заклікі да экстрэмісцкай дзейнасці ці прапагандуе такую дзейнасць»). Падставай для справы стала тое, што Бараноўскі ў сваіх сацсетках змясціў відэаінтэрв’ю Ціханоўскай і банер з інфармацыяй пра колькасць палітвязняў у краіне, якія былі апублікаваныя на «Белсаце».
28 кастрычніка суддзя накіраваў пратаколы на дапрацоўванне. У выніку міліцыянты «дапрацавалі» і склалі 10 пратаколаў, за кожны перадрук матэрыялаў «Белсату». Але 22 лістапада суддзя зноў накіраваў пратаколы на дапрацоўванне.
АЛ belsat.eu
