З пачатку поўнамаштабнага ваеннага ўварвання Расеі на тэрыторыю незалежнай Украіны акупацыйныя войскі РФ страцілі 30 % жывой сілы. Пра гэта ў інтэрв’ю УНІАН заявіў кіраўнік Цэнтру вайскова-палітычных даследаванняў Аляксандр Мусіенка.
«Увесь кантынгент Расеі, які цяпер накіраваны на наступальныя дзеянні супраць Украіны, можа складаць ад 55 да 75 тысяч расейскіх вайскоўцаў. Вось такая лічба ёсць, але гэта не ў 5 разоў больш за ўкраінскія сілы. І гэта дакладна не тая лічба, якая патрэбная была Расеі для наступлення.
Усё гэта, па-першае, сведчыць аб тым, што Расея ўжо страціла як мінімум траціну сваёй групоўкі, якую задзеяла 24 лютага. Гэта значыць, 30 % як мінімум з той расейскай групоўкі ўжо страчаныя. Або загінулі, або параненыя, або ўзятыя ў палон», – адзначыў Аляксандр Мусіенка.
Эксперт таксама зазначыў, што папоўніць страты жывой сілы за кошт мабілізацыі Расея не зможа.
«Мабілізаваць і нагнаць свае страты ім не ўдаецца. Таму колькасць войска, якую яны цяпер збіраюць для гэтага «ўдарнага кулака», яны спрабуюць фармаваць з таго, што ёсць. Ім гэта трэба, каб дасягнуць хоць якой-небудзь перавагі, хаця б на адным з кірункаў», – заявіў вайсковы эксперт.
24 лютага 2022 года Расея ўварвалася ў незалежную Украіну. Пачаліся абстрэлы і бамбаванне ўкраінскіх гарадоў. Гіне мірнае насельніцтва. Дамоўленасці аб зялёных калідорах сістэматычна парушаюцца, эвакуацыйныя канвоі абстрэльваюцца. У шмат якіх населеных пунктах назіраецца гуманітарная катастрофа. Аб перамір’і перад праваслаўным Вялікаднем дамовіцца не ўдалося. Ідзе 59-ы дзень вайны.
ЗК belsat.eu
