Супольнасць беларускіх чыгуначнікаў «Belzhd_live» паведамляе, што кітайскі вытворца цягнікоў «CRRC Datong Co., Ltd.» адклаў пастаўку ў Беларусь 15 грузавых электравозаў, бо баіцца санкцыяў.
Беларуская чыгунка мае кантракт з ТАА «Кітайская кампанія экспарту і імпарту электраабсталявання» і ТАА «CRRC Datong Co., Ltd.» на пастаўку 15 грузавых аднасекцыйных электравозаў. Электравозы меліся з’явіцца ў Беларусі яшчэ ў канцы 2023 года. Аднак рэалізацыя праекту была пастаўленая на паўзу, паведамляюць у «Belzhd_live».
Супольнасць беларускіх чыгуначнікаў сцвярджае: кітайцы занепакоеныя тым, што іх могуць абвінаваціць у парушэнні накладзеных на Беларусь санкцыйных абмежаванняў, датычных еўрапейскіх і амерыканскіх дэталяў. Рэч у тым, што пры вытворчасці электравозаў серыі БКГ2 шырока выкарыстоўваюцца запчасткі, вузлы, агрэгаты і дэталі, што вырабляюцца ў заходніх краінах, якія ўвялі санкцыі супраць рэжыму Аляксандра Лукашэнкі.
Паводле «Belzhd_live», размова не ідзе пра адназначную адмову пастаўляць электравозы. Кітайская кампанія шукае развязанне гэтай праблемы.
Адзін з магчымых варыянтаў – арганізацыя вытворчасці без выкарыстання падсанкцыйнага абсталявання. Але, з увагі на долю яго выкарыстання, зрабіць гэта фактычна не рэальна, мяркуюць у «Belzhd_live». Хутчэй за ўсё, кітайскі бок паспрабуе схаваць сляды выкарыстання ўсяго, што можа адносіцца да еўрапейскіх і амерыканскіх кампаніяў. Праўда, у такім выпадку можа істотна павялічыцца кошт прадукцыі, мяркуюць чыгуначнікі.
Глеб Нержын belsat.eu
