Мінабароны паведаміла, што вайскоўцы аднаго са злучэнняў сілаў спецыяльных аперацыяў (ССА) прыбылі ў новы пазіцыйны раён на поўдні Беларусі.
«Тут дэсантнікі выконваюць задачы па патруляванні тэрыторыі, нясенні дзяжурства на блокпастах, вядзенні наземнай і паветранай разведкі з дапамогай беспілотнікаў, а таксама адбіццю нападаў умоўнага суперніка з зямлі і з паветра. Для ўзмацнення нададзены артылерыйскія падраздзяленні», – гаворыцца ў прэс-рэлізе ведамства.
Мінабароны зазначае, што вайскоўцы ССА працуюць у цесным узаемадзеянні з прадстаўнікамі мясцовых органаў улады, МУС і Дзяржаўнага памежнага камітэту.
Імаверна, вайскоўцы ССА знаходзяцца ў памежных з Украінай раёнах. Аднак канкрэтныя лакацыі не называюцца.
Нагадаем, Мінабароны 21 чэрвеня абвесціла раптоўнае правяранне баявой гатовасці Узброеных сілаў Беларусі, якая мае адбыцца на тэрыторыі Берасцейшчыны і Гомельшчыны. Да вучэнняў вучэнняў прыцягнуты вайсковыя падраздзяленні аператыўных камандаванняў, сілаў спецыяльных аперацыяў (ССА), ракетных войск, артылерыі, вайскова-паветраных сілаў і супрацьпаветранай абароны.
Раптоўнае правяранне беларускай арміі было абвешчана на наступны дзень пасля таго, як Дзяржаўны памежны камітэт заявіў пра павелічэнне ўкраінскага вайсковага кантынгенту на мяжы з Беларуссю ў Жытомірскай вобласці і пра недапушчальнасць правакацыяў.
Глеб Нержын belsat.eu
