Справы Анастасіі Крупеніч-Кандрацьевай і Сяргея Крупеніча 23 верасня разглядала суддзя Ленінскага раёну Менску Таццяна Шоцік. Гэтым разам на іх склалі чарговыя пратаколы па адміністратыўным артыкуле 19.11 за перасыл паведамленняў 18 чэрвеня адзін адному, але з розных «экстрэмісцкіх» каналаў, паведамляюць праваабаронцы.
На судзе Анастасія сказала, што наогул не ведала аб тым, што каналы прызнаныя «экстрэмісцкімі», і што нельга такое дасылаць у прыватных паведамленнях мужу. Сяргей жа паабяцаў суддзі больш ніколі не чытаць тэлеграм-каналы. У выніку суддзя Шоцік пакарала абодвух 13-соднявы арыштам.
Анастасію і Сяргея першы раз затрымалі ў сярэдзіне ліпеня. З таго часу іх асудзілі агулам на 84 суткі кожнага за тое, што яны перасылалі ў прыватных паведамленнях адзін адному інфармацыю з «экстрэмісцкіх каналаў». Вядома, што пасля затрымання сям’і на адным з праўладных тэлеграм-каналаў з’явілася пакаяльнае відэа з дзяўчынай.
Анастасія Крупеніч-Кандрацьева – настаўніца ў менскай гімназіі, у жніўні ў яе скончваўся кантракт.
АД, belsat.eu
