Міжнародныя грамадскія арганізацыі і партыі павінны ўзяць на сябе выдаткі на ўтрыманне мігрантаў у Беларусі. Пра гэта ў эфіры «Беларусь 1» заявіў кіраўнік Гарадзенскай вобласці Уладзімір Каранік.
«Мы падставілі плячо людзям, якія трапілі ў цяжкую сітуацыю. Але тыя, хто спрыяў яе ўзнікненню, павінны зараз садзіцца за стол перамоваў і вырашаць, якім чынам кампенсаваць выдаткі дзяржавы, але самае галоўнае – як дапамагчы гэтым няшчасным людзям выйсці з цяжкай жыццёвай сітуацыі», – заявіў Каранік.
Паводле яго, «гэта праблема міжнароднай супольнасці. І міжнародныя грамадскія арганізацыі, палітычныя партыі павінны браць на сябе фінансавы цяжар па ўтрыманні гэтых людзей».
«Натуральна, усё будзе палічана і выстаўлена», – заявіў гарадзенскі кіраўнік.
Напярэдадні ў эфіры тэлеканалу СТВ выкладчыца Акадэміі кіравання пры прэзідэнце Юлія Абуховіч заявіла, што суткі знаходжання мігрантаў у лагістычным цэнтры каля «Брузгоў» каштуюць каля 20 тыс. еўра.
МГ belsat.eu
