Падчас урачыстасцяў у Варшаве з нагоды гадавіны паўстання Кастуся Каліноўскага пасол Украіны ў Польшчы зачытаў віншаванне ад прэзідэнта Украіны Уладзіміра Зяленскага. У гэтым лісце ўкраінскі лідар сказаў пра народы, якія аб’ядналіся супраць расейскага імперыялізму, але не згадаў сярод іх беларусаў. Рада БНР адрэагавала на гэты зварот.
Рада Беларускай Народнай Рэспублікі выказала засмучэнне тым, што прэзідэнт Украіны Уладзімір Зяленскі не знайшоў магчымасці прыгадаць удзел беларускага народу ў 160-гадовы юбілей пачатку паўстання Кастуся Каліноўскага супраць Расейскай імперыі.
«Прычына гэтага зразумелая і палягае не ў гісторыі, а ў сучаснасці: саўдзел Лукашэнкі ў агрэсіі супраць Украіны.
Аднак важна памятаць, што Лукашэнка з’яўляецца ўзурпатарам і не выяўляе волі беларускага народу. Ён выконвае волю Пуціна, у інтарэсах якога знішчыць незалежнасць Беларусі».
У звароце Рады БНР таксама гаворыцца, што цяпер шмат якіх прадстаўнікоў беларускага народу рэпрэсуюць, катуюць у турмах. Шмат якія беларусы распачалі партызанскую вайну ў самой краіне, а іншыя разам з украінскімі жаўнерамі змагаюцца супраць расейскага агрэсара – у тым ліку і ў палку, які носіць імя Кастуся Каліноўскага.
«Падзеі апошняга часу пацвердзілі, што свабода і дэмакратычная перспектыва Балта-Чарнаморскага рэгіёну немагчымая без незалежнай і дэмакратычнай Беларусі, ажыццявіць і гарантаваць якую можа толькі беларускі народ».
У звароце таксама нагадваецца, што Кастусь Каліноўскі ёсць нацыянальным героем Беларусі.
Алена Аляксандрава belsat.eu