Не прайшло і паўтара года пасля поўнамаштабнага ўварвання расейскага войска ва Украіну, як на тэрыторыі самой Расеі пачаліся баявыя дзеянні. Прычым на Маскву ідуць не ўкраінскія вайскоўцы. Толькі за адну ноч з 23 на 24 чэрвеня мяжу з Растоўскай вобласцю перасеклі 1700 адзінак тэхнікі. І гэта паводле афіцыйных паведамленняў мясцовых уладаў.
Гэта камандуючы ПВК Вагнэр» Яўген Прыгожын вядзе сваіх байцоў на Маскву. Той самы Прыгожын, які прымусіў скалануцца ўвесь свет ад звярынай жорсткасці, калі пакараў смерцю пры дапамозе кувалды свайго ж падначаленага за тое, што той трапіў у палон. Цяпер гэты чалавек-кувалда захоплівае расейскія гарады і ідзе туды, адкуль быў пасланы забіваць і рабаваць украінскі народ.
Горад-мільённік Растоў узяты практычна без бою. Ці зрабілі хоць нешта ўлады, каб перадухіліць у горадзе паніку сярод мірнага насельніцтва? Як патлумачылі тое, што адбываецца, гараджанам? Адзін з мясцовых жыхароў Ігар Мацюшэўскі (прозвішча змененае) жыве амаль у цэнтры. У яго сям’я, двое няпоўнагадовых дзяцей: «Ніхто не патлумачыў, што трэба ўвогуле рабіць. Мы ж разумеем, што сітуацыя зусім не ардынарная, калі мякка яшчэ сказаць. Раптам пачнуцца баявыя дзеянні? Што рабіць? І самае галоўнае: нас могуць бамбіць свае ж вайскоўцы, каб пакончыць з вагнэраўцамі? Я ж хаця б чалавек, якія сочыць за тым, што адбываецца ва Украіне не праз тэлевізар. А мая суседка, калі спытала ў мяне, што адбываецца, ніяк не магла ўвогуле ўцяміць, што такое можа адбывацца ў войску. На дачу некаторыя зʼехалі з гораду яшчэ раней. Бо пятніца. Цяпер траса перакрытая. Хто хацеў з гораду вырвацца пасярод ночы, траплялі ў заторы. А куды ехаць? Калі пачнуць калону з тэхнікай прыгожынскай расстрэльваць, то не хацелася б апынуцца там разам з імі на адной дарозе. Сітуацыя жахлівая, і гэта новая рэчаіснасць. Усе проста ў шоку ад таго, што адбываецца».
А тым часам да камандзіраў і байцоў ПВК Вагнэр звярнуўся намеснік камандуючага Аб’яднанай групоўкай войскаў генерал войска Сяргей Суравікін. Можа быць таму, што раней Прыгожын казаў пра яго як пра аднаго з нямногіх «адэкватных» і «дастойных» прадстаўнікоў Міністэрства абароны. «Адэкватны» генерал у позні пятнічны вечар паўстаў перад гледачамі не ў зусім «адэкватным» выглядзе. Відаць, для пераканаўчасці, каб не падумалі, што ён у такі важны для краіны момант быў у лазні з мужыкамі, з ім быў аўтамат. Дарэчы, не адзін ён у гэты вечар быў з аўтаматам. Сілавікі вельмі актыўна і наглядна, нягледзячы на ўсю наяўную інфармацыю аб месцы перабывання Прыгожына, працягвалі шукаць яго ў Пецярбурзе. Бегалі па горадзе з аўтаматамі. Натуральна, лепш бегаць па Піцеры – гэта пакуль бяспечна, відовішчна і, мусіць, для кагосьці пераканаўча. Ва ўсякім разе для тых, хто патрабуе нейкіх дзеянняў. Яно і зразумела. Выступу Пуціна чакалі вельмі доўга.
І нарэшце дачакаліся. Пуцін ні разу не вымавіў прозвішча Прыгожына. Пуцін свайго былога кухара і ягоную кампанію называў: «тыя здраднікі». Але пры гэтым ён публічна пацвердзіў мяцеж у войску і спробу вайсковага перавароту. А гэта ўбачылі і тыя мільёны гледачоў, якія паняцця не мелі, што такое ПВК Вагнэра і хто такія тыя самыя «здраднікі». А яшчэ яны цяпер даведаліся, што ідуць вайскоўцы на Маскву. Пры гэтым Пуцін чарговы раз прадэманстраваў сваё: «Расея гэта я», «няма мяне – няма Расеі». Але самае галоўнае – Пуцін упершыню як бы прапанаваў сваім суграмадзянам выбар. Выбар паміж сабой каханым і яшчэ кімсьці. Такім чынам, вельмі хутка стане відавочна, чаго вартая абвешчаная падтрымка Пуціна 89 %.
А тым часам пад Варонежам ідуць баі. Самыя інтэнсіўныя – паўднёвай частцы вобласці, каля райцэнтраў Паўлоўск, Багучар і Верхні Мамон. Усе яны размешчаныя ў наваколлях трасы «Дон», каля буйных дарожных развязак. Некаторыя прыкметы паказваюць на тое, што вагнэраўцы могуць абыйсці перакрытую трасу «Дон». Яны могуць частку сваіх сілаў пакінуць у гарадах, а іншыя свае сілы накіраваць на Валгаград. Гукі баёў з ужываннем бранятэхнікі чутныя ў самім Варонежы. Тым больш, што баі ідуць у прадмесці – у Рагачоўцы. Спытала ў жыхаркі Варонежу, сваёй знаёмай Алы Ляшанковай (прозвішча змененае), якая жыве ў горадзе ўсё жыццё. «У нас стары дом, і ў двары ёсць клець. Мы ўжо дамовіліся, што калі што, дык там перасядзім. Там ёсць яма для бульбы. І побач яшчэ падвальчык з закаткамі. Ужо аднеслі туды старую кушэтку, коўдры, вёдры. Не, не з вадой. Ну… каб у якасці прыбіральні іх выкарыстоўваць. Ці мала што там будзе. А ваду ў слоіках паставілі. Там яшчэ і ўзвары стаяць. Спадзяемся, што хопіць. А маладыя людзі высоўваюцца і здымаюць відэа. Але страшна. Божа, ніколі не думала, што так страшна, калі страляюць нечым з паветра. Гук жудасны зверху, а потым гэты свіст і грукат. Гэта яны па іх страляюць? Такое адчуванне, што гэта вайна і бамбуюць горад. Страшна. Ну, я яшчэ разумею, калі б гэта ўкраінцы стралялі. А тут… Мы з мужам ужо пенсіянеры. Госпадзі, хто мог падумаць, што дажывем да такога», – сказала мая суразмоўніца.
Увесь свет сочыць за тым, як развіваюцца падзеі на тэрыторыі Расеі. Хто каго пераможа, нікому асабліва не цікава. Галоўнае, як пішуць не без злараднасці людзі ў сацсетках, каб было як мага больш стратаў з абодвух бакоў. Народ жартуе, што паступова сталі праяўляцца межы Масковіі. Тым больш што губернатар Маскоўскай вобласці Андрэй Варабʼёў заклікаў часова адмовіцца ад паездак на асабістым транспарце на поўдні Маскоўскай вобласці, а таксама за межы рэгіёну. А на некаторых паўднёвых трасах Маскоўскай, Тульскай і Калужскай вобласцяў сталі зʼяўляцца блокпасты і вайсковая тэхніка. На гэтым фоне абнадзейліва гучыць выказванне кіраўніка МЗС Чэхіі Яна Лісоўскага: «Бачу, набліжаецца мой летні адпачынак у Крыме».
Любоў Лунёва belsat.eu
Меркаванне аўтараў можа не супадаць з пазіцыяй рэдакцыі.