У Telegram-канале «Пресс-служба Пригожина» пасля амаль 4-гадзіннага маўчання апублікаваны новы аўдыязапіс. Кіраўнік ПВК Вагнэра Яўгеній Прыгожын заявіў, што найміты «мінулі ва ўсіх месцах дзяржаўныя межы» і «зараз уваходзяць у Растоў».
У новым аўдыязапісы, што з’явіўся ў Telegram-канале «Пресс-служба Пригожина», кіраўнік ПВК Вагнэра Яўгеній Прыгожын паўтарыў абвінавачванні на адрас Мінабароны Расеі ў абстрэле лагера наймітаў:
«Сёння па нас быў нанесены ракетны ўдар. Пасля гэтага адпрацавалі гелікоптары, пасля гэтага артылерыя. Каманды зыходзілі ад начальніка Генеральнага штабу аб знішчэнні ПВК Вагнэра. Пасля нарады з міністрам абароны Шайгу, на якой яны ўхвалілі гэтае рашэнне: знішчыць непакорлівыя падраздзяленні, якія Радзіму гатовыя абараняць, а іхныя азадкі – не».
Прыгожын сцвярджае, што на стрымліванне «вагнэраўцаў» Мінабароны кінула жаўнераў тэрміновай службы:
«Яны адышлі ў бакі. Мы не ваюем з дзецьмі. Мы ваюем толькі з прафесіяналамі. Але калі хтосьці ўстане на шляху, мы знішчым усё, што будзе ўставаць на шляху. Мы працягваем руку кожнаму. Не трэба пляваць у гэтую руку. Мы ідзем далей, ідзем да канца».
Кіраўнік ПВК Вагнэра таксама заявіў, што ягоныя баевікі «мінулі дзяржаўныя межы»:
«Мы мінулі ва ўсіх месцах дзяржаўныя межы, памежнікі выходзілі насустрач і абдымаліся з нашымі байцамі. Зараз мы ўваходзім у Растоў».
Іншых пацверджанняў інфармацыі Прыгожына аб перасоўванні ягонага фармавання пакуль няма.
Таксама кіраўнік ПВК Вагнэра заявіў, што кіраўнік расейскага Генштабу Валерый Герасімаў загадаў нанесці авіяўдар па калонах наймітаў:
«Начальнік Генштабу скамандаваў падняць самалёты і адкрыць агонь па калонам, што ідуць сярод цывільных машын, цяжкавікоў. Яму абы-каго забіваць. Я хачу сказаць дзякуй пілотам, якія адмовіліся выконваць злачынныя каманды».
Тым часам генеральны пракурор Расеі Ігар Красноў сустрэўся з прэзідэнтам Уладзімірам Пуціным і далажыў яму пра крымінальную справу супраць кіраўніка ПВК Вагнэра, паведаміў спікер Крамля Дзмітрый Пяскоў. Паводле яго, генпракурор заявіў аб законнасці гэтай справы.
Пяскоў таксама сказаў, што Мінабароны, ФСБ, МУС і Расгвардыя «кругласутачна дакладваюць Пуціну аб захадах на ягонае даручэнне ў звязку са спробаю мяцяжу».
Раней ФСБ Расеі завяла супраць Прыгожына крымінальную справу паводле артыкула аб узброеным мяцяжы. Яму пагражае ад 12 да 20 гадоў зняволення.
Сяргей Крот belsat.eu
